शहादा (प्रतिनिधी) : येथील सोनामाई शिक्षण प्रसारक मंडळाच्या सचिव वर्षा जाधव यांनी रक्षाबंधनाच्या निमित्त सामाजिक बांधिलकी जपत विद्यार्थिनींना गणवेश व वह्या वितरणाचा आदर्श उपक्रम राबविला आहे.
रक्षा बंधन ही भारतीय संस्कृतीतील भाऊ – बहीण यांच्या अतूट नात्यातील एक आदर्श प्रेम , स्नेह व विश्वासाचं एक उत्सव आहे. या उत्सवानिमित्त दरवर्षी वसंतराव नाईक व कर्मसाक्षी नानासाहेब प्रेमचंद जाधव शैक्षणिक संकुलातील शिक्षक व शिक्षकेतर कर्मचारी बांधवांना सोनामाई शिक्षण प्रसारक मंडळाच्या सचिव वर्षा जाधव यांनी रक्षाबंधनाच्या निमित्त पदाधिकारी , प्राध्यापक , शिक्षक व शिक्षकेतर बंधू हे स्वतःहून आवर्जून सौ. वर्षाताई संजय जाधव यांच्याकडे जावून राखी आपल्या हातावर बांधून घेतात. याप्रसंगी वर्षा जाधव ह्या आपल्या लाडक्या भावांचे औक्षण करून हातावर राखी बांधतात आणि भाऊ बहिणीला रक्षण , संस्थेचे संवर्धन आणि विद्यार्थी विद्यार्थ्यांच्या विकासाचे वचन देत बहिणीला स्वयं सिध्दतेने ओवळणीची भेट देत असतात.
या भावांच्या ओवळणीतून दरवर्षी गोर – गरीब , गरजू १०० विद्यार्थ्यांना गणवेश , दप्तर , वह्या , पुस्तके शैक्षणिक साहित्य वितरण केले जाते तसेच गरजूना कोरोना काळात जीवनावश्यक साहित्यांचे किट , सॅनिटायझर , मास्क , वितरण , वृध्दाश्रमातील ज्येष्ठांना हिवाळ्याच्या दिवसात गरम शाल वाटप,विक्स,आयोडेक्स इ. वस्तू याशिवाय कुंजबिहारी प्रतिष्ठानच्या श्रीकृष्ण गोशाळेला चारा – पशुखाद्य व संकुलातील महिला शिक्षिका व शिक्षकेतर बघिनिंना प्रोटीन युक्त हॉरलेक्स , कॉम्पलान वितरण , स्त्री शक्तीला वंदन या उपक्रमाअंतर्गत विविध कल्याणकारी उपक्रमांचे आयोजन करण्यात येते.
रक्षाबंधन पर्वाचे आज अखंडपणे २५ वर्षे पूर्ण होत असून रौप्य महोत्सवी वर्ष वाटचाल सुरू आहे , यावर्षी रक्षाबंधन नंतर शारदा कन्या विद्यालयात विद्यार्थिनींना गणवेश, वह्या व शैक्षणिक साहित्य वितरण करण्याच्या कार्यक्रमाचे आयोजन हरित क्रांतीचे प्रणेते वसंतराव नाईक यांच्या पुण्यतिथी निमित्त करण्यात आले. या कार्यक्रमाच्या अध्यक्षस्थानी सातपुडा शिक्षण प्रसारक मंडळाचे सचिव प्रा. भैय्यासाहेब संजय जाधव , सोनामाई शिक्षण प्रसारक मंडळाच्या सचिव वर्षा जाधव , शारदा कन्या विद्यालयाच्या मुख्यध्यापिका एस. झेड. सैय्यद , वसंतराव नाईक महाविद्यालयाचे प्राचार्य डॉ. ए. एन. पाटील , महिला महाविद्यालयाचे प्राचार्य डॉ. व्ही. एस. पाटील , वसंतराव नाईक विद्यालयाचे मुख्यध्यापक एम.बी. मोरे , शारदा कन्या विद्यालयाचे पर्यवेक्षक एन. बी. कोते , प्रा. अनिल साळुंके , प्रमोद जाधव , विजय जाधव सर्व पदाधिकारी , शिक्षक , शिक्षकेतर कर्मचारी व विद्यार्थीनी मोठ्या संख्येने उपस्थित होते.
याप्रसंगी हरित क्रांतीचे प्रणेते व महाराष्ट्राचे माजी मुख्यमंत्री वसंतराव नाईक यांच्या प्रतिमेचे पूजन व अभिवादन व शैक्षणिक साहित्याचे वितरण उपस्थित मान्यवरांच्या हस्ते करण्यात आले. यावेळी कार्यक्रमाचे अध्यक्ष प्रा. भैय्यासाहेब संजय जाधव यांनी , रक्षाबंधनचा सण हा बहीण – भावातील स्नेहाचा पवित्र दिवस असून सौ. वर्षा जाधव यांनी गेल्या २५ वर्षे अखंडपणे आपल्या शैक्षणिक संकुलातील शिक्षक व शिक्षकेतर कर्मचाऱ्यांना राखी बांधत असतात , त्या निमित्त आलेल्या ओवळणीतून दरवर्षी सामाजिक बांधिलकी जपत गरजवंत विद्यार्थ्यांना शैक्षणिक साहित्य वितरण करण्यात येते. विद्यार्थिनींनी दिलेल्या साहित्याचा सदुपयोग करावा, असे प्रतिपादन केले.
या कार्यक्रमाचे प्रास्ताविक प्रा. अनिल साळुंके , सूत्रसंचालन श्रीमती प्राजक्ता पारखे तर आभार संदीप मोरे यांनी केले. या कार्यक्रमाच्या यशस्वितेसाठी शारदा कन्या विद्यालयातील सर्व शिक्षक व शिक्षकेतर कर्मचारी वृंद यांनी परिश्रम घेतले. वर्षा जाधव यांनी सामाजिक बांधिलकी जपत गेल्या २५ वर्षा पासून करीत असलेल्या अनोख्या रक्षाबंधनाच्या निमित्त विविध राबविलेल्या उपक्रमांचे सर्वत्र कौतुक करण्यात येत आहे.
