धुळे (प्रतिनिधी) – स्मार्ट वीज मीटर बसवण्यास विरोध करून शासकीय कामात अडथळा आणत एका ग्राहकावर आझादनगर पोलिस ठाण्यात गुन्हा दाखल करण्यात आला. आरोपी एवढ्यावरच थांबला नाही तर त्याने महावितरणच्या अभियंत्यांस मारहाण, शिवीगाळ करत जिवे मारण्याची धमकीही दिली. धुळे शहर व परिसरात महावितरण कर्मचाऱ्यांना स्मार्ट मीटर बदलताना मज्जाव व मारहाण केल्याची ही आठवडाभरातील तिसरी घटना आहे. सतत होणाऱ्या या प्रकारांमुळे स्मार्ट मीटरला अडथळे आणणाऱ्यांवर कठोर कायदेशीर कारवाई करण्याचा इशारा महावितरणने दिला आहे.
महावितरणच्या पारोळा रोड कक्षाचे सहायक अभियंता आकाश बावणे हे बुधवारी 9 सप्टेंबर 2026 रोजी दुपारी 3.30 वाजेच्या सुमारास तंत्रज्ञ दीपक पाटील, एनसीसी कंपनीचे स्मार्ट मीटर बदलणारे शोएब गुलाब शेख असे तिघेजण फ्लॅट नं. 401, डोंगरे महाराज नगर येथे ग्राहकाचे जुने मीटर काढून नवीन स्मार्ट मीटर बसवण्यासाठी गेले होते. त्यांनी तेथे राहणाऱ्या रत्नाबाई सुनील नेरकर यांना नवीन स्मार्ट मीटर बसविण्याचे फायदे समजावून सांगितल्यावर त्यांनी मीटर बसवण्यास होकार दिला आणि त्या घरात निघून गेल्या. पथकाने मीटर बसविले. अपडेट करण्याचे बाकी असताना रत्नाबाई सुनील नेरकर खाली आल्या. त्यांचे पती सुनील नेरकर यांना फोन लावून दिला. अभियंता बावणे यांनी नेरकर यांना फोनवर स्मार्ट मीटरचे फायदे समजावून सांगितले. त्यानंतर 5 ते 10 मिनिटांनी चारचाकी वाहनातून 3 इसम आले. त्यातील घरमालक सुनील नेरकर याने सहायक अभियंता कोण आहे असे विचारत बावणे यांना चापट मारली व अर्वाच्य शिवीगाळ केली. नेरकर हा बावणेंना मारण्यासाठी अंगावर पुन्हा धावून येत होता. ‘तुला पाहून घेईल. तू नेहमी इथून ये-जा करत असतो,’ अशी जिवे मारण्याची धमकी बावणेंना दिली. याबाबत बावणे यांच्या फिर्यादीवरून सुनील नेरकर याच्यावर आझादनगर पोलिस ठाण्यात रात्री गुन्हा दाखल करण्यात आला.
