मुंबई (वृत्तसंस्था) भाजप नेते किरीट सोमय्यांनी मुंबईत साडेसात हजार कोटींचा घोटाळा केला. किरीट सोमय्या जेलमध्ये जाणार हे नक्की आहे. मी सगळे पुरावे गृहमंत्रालयाला दिले आहेत. फडणवीस, ईडी, केंद्रीय गृहमंत्री अमित शाह यांच्या नावे धमक्या देऊन किरीट सोमय्यांनी खंडणी वसूल केली आहे, असा आरोप देखील शिवसेना नेते खा. संजय राऊत यांनी केला आहे.
याविषयी बोलताना संजय राऊत म्हणाले की, ‘किरीट सोमय्या यांनी गेल्या काही वर्षांमध्ये तब्बल ७५०० कोटी रुपयांचा भ्रष्टाचार केला आहे. तसेच किरीट सोमय्या आपल्याच चपलेने स्वच:लाच मारणार असून लोक लवकरच किरीट सोमय्या यांची कपडे काढून धिंड काढतील.’ असे देखील राऊत म्हणाले आहेत. तसेच पवईतील पुनवर्सन प्रकल्पामध्ये बोगस लाभार्थींची नावे घुसवण्यासाठी तत्कालीन मुख्यमंत्री देवेंद्र फडणवीसांनी मंजुरी दिली होती. त्यावेळी सोमय्यांनी या मंजुरीसाठी देवेंद्र फडणवीस यांना ५० कोटी दिले असल्याचे सांगितले होते.’
पुढे बोलताना राऊत म्हणाले की, ‘सोमय्या दिल्लीतील काही नेत्यांची धमकी देऊन पैसे उकळत आहेत. अमित शाहांच्या नावावरही त्यांनी पैसे उकळले आहेत. सोमय्यांनी फडणवीसांच्या नावावर पैसे उकळले असले तरी यात फडणवीस सहभागी असतील असे मला वाटत नाही. सोमय्या यांच्याविरोधात माझ्याकडे अनेक लोकांनी तक्रारी केल्या आहेत. माझ्याकडे त्यांच्याविरोधात एकूण २११ प्रकरणे आहेत. आता मी रोज एकएक प्रकरण बाहेर काढणार आहे.’ असा इशारा देखील संजय राऊतांनी दिला आहे.
