फैजपूर (प्रतिनिधी) यावर्षी कोरोना महामारीचे संकट लक्षात घेऊन हरिद्वार येथील कुंभमेळा शासन नियमाचे पालन करून यशस्वीपणे संपन्न झाल्याचे सतपंथ संस्थानचे गादीपती तथा अखिल भारतीय संत समितीचे खजिनदार महामंडलेश्वर जनार्दन हरीजी महाराज यांनी सांगितले. नुकतेच त्यांचे फैजपूर येथे आगमन झाले.
फैजपूर येथील सतपंथ मंदिरात त्यांच्या मातोश्री यांनी औक्षण करून स्वागत केले. तत्पूर्वी भुसावळ येथे रेल्वे स्टेशन वर आमदार संजय सावकारे यांनी त्यांचे पुष्पगुच्छ देऊन स्वागत केले. दरम्यान फैजपुर येथे आगमन होताच त्यांनी मुख्याधिकारी किशोर चव्हाण यांच्याशी संपर्क साधून त्यांनी त्यांच्यासह गेलेल्या सहकार्यांची कोरोना चाचणी केली. ती चाचणी निगेटिव्ह आली आहे.
महामंडलेश्वर जनार्दन हरीजी महाराज यांनी सांगितले की, हरिद्वार येथील स्वामी जगन्नाथ धाम येथे आयोजित विविध कार्यक्रमात कुंभ काळातील शाही स्नानाचा लाभ, भारतभरातून आलेल्या सर्व संत महात्म्यांचे दर्शन व आशीर्वाद मिळाला. या सात दिवसांमध्ये संगीतमय सुमधुर गोपीगीत कथेचे आयोजन करण्यात आले होते. या कथेचे प्रक्षेपण दिशा टीव्ही चॅनल वर प्रसारित करून जगभरातील असंख्य भक्तांनी याचा लाभ घेतला. ह्या संपूर्ण कार्यक्रमात प्रेरणापीठ पिराणाचे जगद्गुरु सतपंथाचार्य ज्ञानेश्वर दासजी महाराज, श्री जगन्नाथ धामचे महंत श्री अरुणदासजी महाराज, श्री निर्मल पंचायती आखाड्याचे महंत श्री ज्ञानदेव सिंह महाराज, महामंडलेश्वर श्री हरि चैतना नंदजी महाराज, पूज्य गीता मनिशी ज्ञानानंदजी महाराज, साधवी कृष्ण कांताजी महाराज, महामंडलेश्वर श्री जयरामदास जी महाराज, कुसुंबा तालुका रावेर येथील श्री राम मंदिर ट्रस्टचे महंत भरत दासजी महाराज, फैजपूर येथील खंडेराव देवस्थानचे गादीपती महामंडलेश्वर पुरुषोत्तम दासजी महाराज, सतपंत संस्थांचे प्रमुख देवजी भाई पटेल, महामंत्री पवनजी नारंग, मुखी महाराज अशोक नारखेडे आधी संत महात्म्य यांनी उपस्थिती दिली.
या कार्यक्रमादरम्यान श्री निर्मल आखाडा येथे सनातन वैदिक सपंत संप्रदायाचे संत श्री जयराम हरीजी महाराज व दिव्यानंद जी महाराज यांचा पट्टाभिषेक सोहळा संपन्न होऊन त्यांना महामंडलेश्वर ही उपाधी प्रदान केली. परमपूज्य महामंडलेश्वर जनार्दन हरीजी महाराज यांनी नित्यनियमाने त्यांचे प्रेरणास्थान, जगद्गुरु, साकेतवासी स्वामी रामानंदाचार्य हंसदेवाचार्य यांचे स्मरण करून आपल्या दिनचर्येला सुरुवात केली.
