नाशिक (वृत्तसंस्था) राज्यात एकीकडे ऑक्सिजनचा तुटवडा असताना नाशिकच्या झाकीर हुसेन रुग्णालयात ऑक्सिजनच्या टँकमध्ये अचानक गळती झाली. झाकीर हुसेन रुग्णालय हे नाशिक महापालिकेचं रुग्णालय आहे. घटनेची माहिती मिळताच दुरुस्ती करण्यासाठी रेस्क्यू पथक घटनास्थळी दाखल झालं होतं. मात्र, या गळतीमध्ये रुग्णालयातील ऑक्सिजनवर असलेल्या २२ रुग्णांचा मृत्यू झाला आहे, अशी माहीती जिल्हाधिकारी सुरज मांढरे यांनी दिली आहे.
ऑक्सिजन टॅंकला गळती लागल्यानं हजारो लिटर ऑक्सिजन वाया गेल्याची घटना आज दुपारी १ वाजता घडली. या घटनेत २२ रुग्णांचा मृत्यू झाला आहे. रुग्णालयातील एकूण १५० रुग्ण व्हेंटिलेटर आणि ऑक्सिजनवर होते. त्यापैकी १३१ रुग्ण ऑक्सिजनवर होते आणि १५ रुग्ण व्हेंटिलेटरवर होते. झाकीर हुसेन रुग्णालयातील ऑक्सिजन टँकची गळती रोखली असून पुरवठा पूर्ववत झाला आहे. मात्र, या घटनेसाठी जबाबदार असणाऱ्या व्यक्तींवर कारवाई केली जाईल, असं नाशिक महापालिका आयुक्त कैलास जाधव यांनी सांगितलं आहे.
दरम्यान, १३ KL क्षमतेचा हा ऑक्सिजन टँक होता. ऑक्सिजन टँकमध्ये गळती झाल्यानं तो सर्वत्र पसरला आहे. या गळतीनंतर ऑक्सिजन पुरवठा तब्बल अर्धा तास खंडित झाला होता. यावेळी शिवसेनेचे महानगर प्रमुख सुधाकर बडगुजर यांनी घटनास्थळाची पाहणी केली. या गळतीमध्ये ३० ते ३५ रुग्ण दगावले असतील, अशी भीती व्यक्त करत जबाबदार व्यक्तींवर सदोष मनुष्यवधाचा गुन्हा दाखल करण्याची मागणी त्यांनी केली आहे. तर संपूर्ण माहिती घेऊन परिपत्रक जारी केलं जाईल, असं राज्याचे आरोग्य मंत्री राजेश टोपे यांनी सांगितलं आहे.
