जळगाव (प्रतिनिधी) जिल्ह्यातील रावेर आगारात निलंबित करण्यात आलेल्या एका एसटी बस चालकानं नैराश्यातून विष प्राशन करून आत्महत्या करण्याचा प्रयत्न केल्याची धक्कादायक घटना घडली. दरम्यान, वेळीच उपचार मिळाल्यानं एसटी बस चालकाचे प्राण वाचले आहे. राहुल विश्वनाथ कोळी (वय ३५) असं बस चालकाचं नाव आहे.
यासंदर्भात अधिक असे की, कोळी हे रावेर तालुक्यातील तांदलवाडी येथील रहिवासी असून आज त्यांना एसटी महामंडळाकडून निलंबित केल्याचे पत्र आलं होतं. त्यामुळं कोळी नैराश्यात होते. आज दुपारी एक ते दीड वाजण्याच्या सुमारास एसटी डेपोमध्ये असतानाच त्यांनी विषारी औषध प्राशन केलं. औषध घेताच ते खाली कोसळले. त्यांना डेपो मॅनेजर जी. पी. जंजाळ व अन्य कर्मचारी, कंडक्टर आणि ड्रायव्हर यांनी तत्काळ बसमध्ये टाकून रावेर येथील ग्रामीण रुग्णालयात दाखल केलं. रावेर ग्रामीण रुग्णालयाचे वैद्यकीय अधिकारी डॉ. एन एस. चव्हाण यांनी तात्काळ उपचार केल्यानं त्यांची प्रकृती आता स्थिर आहे.
