नागपूर (वृत्तसंस्था) छत्तीसगडमधील बेपत्ता अधिकाऱ्याचा मृतदेह नागपूरमधील लॉजवर संशयास्पद अवस्थेत आढळला. मंत्रालयातील कोषागार विभागात कार्यरत सहसंचालक राजेश श्रीवास्तव यांचा बुधवारी नागपूर येथील लॉजमध्ये संशयास्पद स्थितीत मृतदेह आढळून आला. या घटनेने नागपुरात प्रचंड खळबळ उडाली आहे. याप्रकरणी पोलिसांनी आकस्मिक मृत्यूची नोंद करून तपास सुरू आहे.
छत्तीसगडच्या कोषागार विभागात सहसंचालकपदी कार्यरत असलेले राजेश श्रीवास्तव १ मार्चपासून बेपत्ता होते. नागपूरमधील लॉजवर राजेश श्रीवास्तव यांचा मृतदेह आढळल्याची माहिती मिळाल्यानंतर रायपूर पोलीस घटनास्थळी दाखल झाले. राजेश श्रीवास्तव यांनी आत्महत्या केली असल्याचा प्राथमिक संशय व्यक्त केला जात आहे. सूत्रांनी दिलेल्या माहितीनुसार, १ मार्च रोजी राजेश श्रीवास्तव हे पत्नीसह बिलासपूर येथे आले होते. पत्नीला बिलासपूर येथे सोडून दुपारी ते तेथून निघाले. त्यानंतर ते नागपुरात आले. सीताबर्डीतील पूजा लॉजमधील १०४ क्रमांकाच्या खोलीत ते थांबले. बुधवारी सकाळी १० वाजताच्या सुमारास नाश्ता केल्यानंतर ते बाहेर गेले. काही वेळाने परत लॉजमध्ये आले. त्यानंतर सायंकाळी ते खोलीतून बाहेर न निघाल्याने येथील कर्मचाऱ्यांना संशय आला. त्यांनी श्रीवास्तव यांना आवाज दिला. मात्र आतून प्रतिसाद मिळाला नाही. कर्मचाऱ्याने खिडकीतून बघितले असता श्रीवास्तव हे मृतावस्थेत दिसले आणि एकच खळबळ उडाली. कर्मचाऱ्याने हॉटेल व्यवस्थापकाला याबाबत माहिती दिली. त्यानंतर व्यवस्थापकाने लगेचच सीताबर्डी पोलिसांना कळविले. ही माहिती मिळताच सीताबर्डी पोलिसांचा ताफा तेथे पोहचला. दरवाजा तोडून पोलीस खोलीत गेले व मृतदेह ताब्यात घेण्यात आला. पोलिसांनी याप्रकरणी आकस्मिक मृत्यूची नोंद करून मृतदेह शवविच्छेदनासाठी हॉस्पिटलकडे रवाना केला आहे. पोलिसांनी खोलीतील आधारकार्ड, मोबाइलसह अन्य साहित्य जप्त केले आहे.
दरम्यान, १ मार्च रोजी दुपारी श्रीवास्तव हे बिलासपूरमधील इद्रावती भवनमधून बाहेर निघाले. दुपारी १२.३० वाजता त्यांच्या मोबाइलचे शेवटचे लोकेशन हे छेडीखेडी पुलाजवळ आढळून आले, असे कळते. बदली झाल्याने ते तणावात होते व त्यातूनच त्यांनी आत्महत्या केली असावी अशी शक्यता व्यक्त केली जात आहे.
