कोयम्बतूर (वृत्तसंस्था) शाळेत शिक्षकाकडून सुरू असलेल्या लैंगिक शोषणाच्या त्रासाला कंटाळून एका बारावीच्या विद्यार्थिंनीनं राहत्या घरात गळफास घेत आत्महत्या केली आहे. या घटनेची माहिती मुलीच्या आईवडीलांकडून मिळताच पोलिसांनी घटनास्थळी धाव घेत घटनेचा पंचनामा केला आहे. तामिळनाडू मधील कोयम्बतूरमध्ये ही घटना घडली आहे. यावेळी पोलिसांना मृत मुलीच्या खोलीतून एक सुसाईड नोट मिळाली.
संबंधित घटना तामिळनाडू राज्यातील कोयम्बतूर येथील आहे. याच शहरातील रहिवासी असणारी १७ वर्षीय पीडित तरुणी एका खाजगी शाळेत इयत्ता बारावीत शिकत होती. गेली काही दिवस कोरोनामुळे शाळा बंद राहिल्यानंतर, अलीकडेच तामिळनाडूमधील शाळा सुरू झाल्या होता. पीडित मुलीनं देखील शाळेत जायला सुरुवात केली होती. पण शाळेतील शिक्षक मिथुन चक्रवर्ती याची पीडितेवर वाईट नजर होती. आरोपी पीडितेला एकटं गाठून तिचं लैंगिक शोषण करत होता. बरेच दिवस अत्याचार सहन केल्यानंतर, पीडितेनं सध्याची शाळा सोडायची असल्याची मागणी आपल्या कुटुंबीयांकडे केली. त्यानुसार शाळेतून दाखला देखील देण्यात आला. पण शुक्रवारी पीडित मुलीनं आपल्या राहत्या घरात गळफास घेत आत्महत्या केली आहे. शाळेतील एक शिक्षक तिचं लैंगिक शोषण करत होता, त्यातूनच तिने आत्महत्या केल्याचा आरोप पीडित मुलीच्या कुटुंबीयांनी केला आहे.
तसेच पीडित मुलीनं आत्महत्येपूर्वी लिहिलेल्या चिठ्ठीत देखील आरोपी शिक्षक मिथुन चक्रवर्तीचा उल्लेख केला आहे. नातेवाईकांच्या तक्रारीनंतर, पोलिसांनी आरोपी शिक्षकाविरोधात पोक्सो कायद्याअंतर्गत गुन्हा दाखल केला आहे. नराधम आरोपी शिक्षकाला पोलिसांनी अटक केली असून घटनेचा तपास पोलीस करत आहेत.
