बोदवड (प्रतिनिधी) तालुक्यातील एणगाव हायस्कूलमध्ये हुषार व होतकरू विद्यार्थ्यांच्या माध्यमातून शालेय शिक्षण प्रशासन चालविण्यास सुरुवात केली आहे. २३ ते ३१ जानेवारीदरम्यान होणाऱ्या सर्वेक्षणासाठी एणगांव हायस्कूल मधील मुख्याध्यापक वगळता सर्व शिक्षक या कामासाठी नियुक्त करण्यात आले आहेत. परिणामी, ऐन परीक्षेच्या तोंडावर शिक्षणाचा बोजवारा उडू शकतो. संभाव्य परीक्षेच्या तोंडावर विद्यार्थ्यांचे अध्ययनाचे कार्य सुरळीतपणे सुरू राहावे, याकरता मुख्याध्यापक डॉ. पुरुषोत्तमग गड्डम यांनी शिक्षकदिनी अध्यापन केलेल्या विद्यार्थी शिक्षकांना सोबत घेऊन शाळा नियमित सुरू केली आहे.
एणगाव हायस्कूलमध्ये अनेक विद्यार्थी वरखेड बुद्रुक, वरखेड खुर्द, राजुर, निमखेड आणि घाणखेड या गावांमधून येत असल्याने त्यांच्या जाण्या येण्याच्या वेळा सुकर व्हाव्यात म्हणून, सर्वेक्षणा दरम्यानच्या कालावधीत म्हणजे ३१ जानेवारीपर्यंत शाळेच्या वेळेत अंशतः बदल केलेला आहे. सकाळी नऊ ते दुपारी दोन या वेळामध्ये त्यांनी शाळा नियमित सुरू ठेवण्याचा निर्णय घेतला आहे. यासंदर्भात ग्रुप एज्युकेशन सोसायटीचे चेअरमन एन. डी. बोंडे तथा सर्व संचालक मंडळ यांच्या मार्गदर्शनाखाली एणगाव हायस्कूलच्या वेळेत बदल करण्यात आलेला आहे. विद्यार्थ्यांसाठी हा अनुभव अतिशय रंजक आणि जबाबदारीचा असल्याचे मत, विद्यार्थी शिक्षकांनी यादरम्यान व्यक्त केले.
मराठा समाजाचे मागासलेपण तपासण्यासाठी महसूल विभागाने मोहीम हाती घेतली आहे. याकामी घरोघरी जाऊन तपासणीचे काम शिक्षकांवर लादण्यात आले आहे. याबाबत प्रशिक्षण कार्यशाळा घेण्यात आली. हे सर्वेक्षण कसे वेळात व्हावे, यासाठी सूचना देण्यात आल्या आहेत. मागासवर्ग आयोगाने तयार केलेली प्रश्नावली मोबाईल ॲपद्वारे तयार केली आहे. ती प्रश्नावली लक्षित लाभार्थी यांना विचारण्यात येणार आहे व त्याद्वारे सर्वेक्षण केले जाणार आहे. मागासवर्गीय आयोगाच्या सूचनांनुसार हे सर्वेक्षण केले जाणार असून हे काम किचकट तसेच क्लिष्ट असल्याचे शिक्षकांचे म्हणणे आहे. पण अशाही परिस्थितीमध्ये शाळा नियमित चालावी, यासाठी एणगाव हायस्कूलच्या संचालक मंडळ तथा मुख्याध्यापकांनी हा अभिनव उपक्रम हाती घेतला आहे.गावकऱ्यांनी या उपक्रमाबाबत समाधान व्यक्त केले आहे.
