चाळीसगाव (प्रतिनिधी) चाळीसगाव शहरातील भडगाव रोडवरील माता रमाबाई आंबेडकर नगर परिसरात रात्री उशिरा हातात कोयता घेऊन दहशत निर्माण करणाऱ्या इसमाला पोलिसांनी तातडीची कारवाई करत अटक केली आहे.
दिनांक 04 मे रोजी रात्री 10 वाजेच्या सुमारास एक व्यक्ती कोयता घेऊन परिसरात फिरत असल्याची माहिती पोलिसांना मिळाल्यानंतर, पोहेकॉ अजय अशोक पाटील आणि पोना भुषण मांगो पाटील यांनी दोन पंचांसह घटनास्थळी धाव घेतली. तेथे दादाभाऊ वाल्मिक अहिरे (वय 30, रा. भडगाव रोड, माता रमाबाई आंबेडकर नगर, चाळीसगाव) हा इसम कोयता घेऊन फिरताना आढळून आला. त्याची झडती घेतली असता, सुमारे ₹300/- किमतीचा, 20 सेमी लांब, 5 सेमी रुंद व एक बाजूने धार असलेला लोखंडी कोयता त्याच्याकडे मिळून आला. या शस्त्राचा कोणताही परवाना त्याच्याकडे नसल्याचे निष्पन्न झाले.
या प्रकारामुळे जळगाव जिल्हाधिकारी यांनी लागू केलेल्या शस्त्रबंदी आदेशाचे उल्लंघन झाल्याने, संबंधित इसमाविरुद्ध महाराष्ट्र पोलीस अधिनियम 1951 चे कलम 37(1)(3) सह 135 अन्वये गुन्हा नोंदविण्यात आला आहे. ही कारवाई पोलीस निरीक्षक किरणकुमार कबाडी यांच्या मार्गदर्शनाखाली करण्यात आली असून, पुढील तपास पोलीस हवालदार पंकज पाटील करीत आहेत.
