धरणगाव (प्रतिनिधी) येथील समस्त कुणबी पाटील समाज पंच मंडळ (लहान माळी वाडा) यांची जगद्गुरू संत तुकाराम महाराज बीज सप्ताहाची ३३ वर्षांची परंपरा यावर्षी कोरोनाच्या महामारीमुळे खंडित झाली.
याबाबत सविस्तर वृत्त असे की, लहान माळी वाडा परिसरात समस्त कुणबी पाटील समाज पंच मंडळाच्यावतीने दरवर्षी जगद्गुरू संत तुकाराम महाराज बिजेनिमित्त अखंड हरिनाम किर्तन सप्ताहाचे आयोजन करण्यात येते. मागील ३२ वर्षांपासून या सप्ताहाची परंपरा कायम आहे. परंतु यावर्षी ३३ व्या वर्षी ही परंपरा कोरोनाच्या महामारीमुळे खंडित झाली. दरवर्षी ७ दिवस काकडा आरती, हरिनाम किर्तन, तुकाराम महाराज गाथा पारायण, गुणवंत विद्यार्थ्यांचा सत्कार, शेवटच्या दिवशी काल्याचे किर्तन व महाप्रसादाचा कार्यक्रम अतिशय उत्साहात संपन्न होते. परंतु यावर्षी मात्र कोरोनाचा वाढता प्रादुर्भाव, समाजाच्या दोन माजी अध्यक्षांचे निधन, गावातील व परिसरातील अनेक व्यक्तींचे दुःखद निधन, अनेकांचे आजारपण या सर्व परिस्थितीचा विचार करून व शासन निर्देशांचे पालन करून यावर्षी सप्ताह रद्द करण्याचा निर्णय समस्त कुणबी पाटील समाज पंच मंडळाने घेतला.
२३ तारखेला बीज सप्ताहाची अगदी साध्या पध्दतीने स्थापना व विधिवत पूजा करण्यात आली. आज दि. ३० तारखेला बीज सप्ताहाची समाप्ती झाली. पुढील वर्षी कोरोनाचा कहर कमी होऊन परिस्थिती आटोक्यात आल्यानंतर त्याच उत्साहात सप्ताहाची परंपरा कायम राहील, अशी भावना समस्त कुणबी पाटील समाज अध्यक्ष, पंच मंडळ व सर्व समाज बांधवांनी व्यक्त केली.
