नवी दिल्ली (वृत्तसंस्था) शेख हिरा एक रुग्णवाहिका चालक आहेत. ते पश्चिम बंगालमधील रहिवासी आहेत. त्यांनी सकाळी २७० रुपयांचं लॉटरीचं तिकीट खरेदी केलं होतं. मात्र आपण दुपारपर्यंत करोडपती होणार आहोत, याची त्यांना काहीही कल्पना नव्हती. सकाळी खरेदी केलेल्या तिकीटाचा निकाल जाहीर झाला तेव्हा दुपारी त्यांना समजलं की त्यांनी एक कोटी रुपये जिंकले आहेत.
पश्चिम बंगालच्या पूर्व बर्धमान जिह्यात राहणारा ऍम्ब्युलन्स ड्रायव्हर शेख हिरा याने सकाळी उठून एक कोटी रुपयांचे जॅकपॉट लॉटरीचे तिकीट केवळ २७० रुपयांना खरेदी केले. दुपारपर्यंत तो कोटय़धीश झाला होता. नशिबाने अचानक दिलेल्या सुखद धक्क्यामुळे तो इतका भारावला की, जॅकपॉट जिंकल्यानंतर तो थेट पोलीस ठाण्यात सल्ला घेण्यासाठी गेला. आपल्याजवळील लॉटरीचे तिकीट हरवण्याची भीती त्याला सतावत होती. अखेर शक्तिगड पोलिसांनी त्याला सुखरूप घरी पोहोचवले असून त्याच्या घरी पोलिसांचा फौजफाटा तैनात केला आहे. मिळालेल्या रकमेतून सर्वोत्तम उपचार करून आईला लवकरात लवकर बरे करण्याचा आणि राहण्यासाठी चांगले घर बांधण्याचा त्याचा विचार आहे.
