छत्रपती संभाजीनगर (वृत्तसंस्था) बॉयफ्रेंडसोबत सौदीमध्ये राहून मायदेशी परत आलेल्या महिलेचा देशविघातक कृत्यामध्ये सहभाग असल्याचा एक ई-मेल एटीएस पोलिसांना प्राप्त झाला आहे. त्यावरून सुरक्षा यंत्रणेत खळबळ उडाली आहे. सदर आरोपानंतर सावध झालेल्या एटीएसकडून सदर ई-मेल प्रकरणात सखोल तपास सुरू करण्यात आल्याची माहिती वरिष्ठ सूत्रांनी दिली.
सूत्रांनुसार डिसेंबर २०२२ मध्ये शहरातील एक महिला अचानक बेपत्ता झाली होती. तिच्या पतीच्या तक्रारीवरून ती बेपत्ता झाल्याची रीतसर नोंद सिडको पोलीस ठाण्यात दाखल झाली होती. सोशल मीडियावर एका विदेशी तरुणासोबत तिची ओळख झाली. ओळखीचे रूपांतर प्रेमात झाले व तिने डिसेंबरमध्ये त्याच्या मदतीने विदेशात धूम ठोकली.
काही महिने सौदी अरेबिया व इतर देशांमध्ये तिने वास्तव्य केले. ऑगस्टच्या पहिल्या आठवड्यात ती देशात परतलीदेखील. त्यानंतर नाशिक जिल्ह्यात माहेरी गेली. सध्या तिचे वास्तव्य तेथेच आहे. मात्र, प्रियकरासोबत सौदी व अन्य देशात असताना ती देशविरोधी संस्था, संघटनेच्या संपर्कात आली असून, देशविघातक कृत्यात तिचा सहभाग असल्याचा संशय ई-मेलमध्ये व्यक्त करण्यात आला आहे. ई-मेल प्राप्त होताच पोलिसांनी एटीएसला याबाबत कळविले. त्यानंतर हालचालींनी वेग घेतला व एटीएसने याप्रकरणी कसून तपास सुरू केला आहे. याबाबतचे वृत्त आज दैनिक ‘पुण्य नगरी’ ने प्रकाशित केले आहे.
