पुणे (वृत्तसंस्था) अल्पवयीन प्रेयसीला भेटण्यासाठी प्रियकर तरुण थेट बुरखा घालून तिच्या शाळेत गेला. मात्र, मुले चोरणारा समजून काही जणांनी या तरुणाला बेदम चोप देत पोलिसांच्या हवाली केले. विजय अमृत वाघारी असे अटक केलेल्या तरुणाचे नाव आहे.
विजय याचे आदर्श इंदिरानगर परिसरातील शाळेत इयत्ता दहावीत शिकणाऱ्या एका अल्पवयीन मुलीवर प्रेम होते. दोघेही एकमेकांना भेटण्यासाठी जात होते. दोघांच्या प्रेमसंबंधाची माहिती त्यांच्या कुटुंबाला समजली. दोघांच्या कुटुंबीयांनी त्यांना समज देऊन भेटण्यास मज्जाव केला. प्रेयसीला भेटता येत नसल्याने आरोपी विजय हा वेडापिसा झाला होता.
प्रेयसीला भेटण्यासाठी तो प्रयत्न करत होता. मात्र, त्याला प्रेयसीला भेटता येत नव्हते. अखेर त्याने शक्कल लढवत चक्क बुरखा घालून तिच्या शाळेत जाण्याचा प्लॅन केला. मात्र, त्याचा हा प्लॅन फसला. मुले चोरणारा समजून परिसरातील नागरिकांनी विजयला पकडले. त्यानंतर जमलेल्या लोकांनी त्याला चांगलेच फटके देत पोलिसांच्या ताब्यात दिले. चौकशी केल्यानंतर समोर आलेल्या माहितीनंतर पोलिसांसह उपस्थितांनीही डोक्यावर हात मारून घेतला. पुण्यातील विश्रांतवाडी परिसरात ही घटना घडली असून, पोलिसांनी विजय वाघरी विरुद्ध गुन्हा दाखल केला आहे. याबाबतचे वृत्त आज पुण्य नगरीने दिले आहे.