यवतमाळ (वृत्तसंस्था) वीज खांबावर दुरुस्तीचे काम करीत असलेल्या कंत्राटी कर्मचाऱ्याचा शॉक लागून मृत्यू झाल्याची दुर्दैवी घटना नेर तालुक्यातील पांढरी गावशिवारात शुक्रवारी घडली. या घटनेनंतर संतप्त झालेल्या नातेवाईकांसह ग्रामस्थांनी मृतदेह खांबावरून उतरविणार नाही, असा पवित्रा घेतला. याप्रकरणी चौघांवर गुन्हे दाखल करण्यात आले. त्यानंतर मृतदेहासह वीज वितरणवर धडक देण्यात आली. अधिकाऱ्यांच्या आश्वासनानंतर तणाव निवळला.
पंकज उर्फ क्षितिज दुर्योधन करडे (२५) रा. खरडगाव असे मृतक कंत्राटी वायरमनचे तर ऑपरेटर गजानन चक्करवार, भुषण वीर, विक्की कांबळे, मुकुंद गावंडे अशी गुन्हा दाखल झालेल्यांची नावे आहेत. मृतकाची शिरसगाव वीज वितरण कंपनीच्या सबस्टेशनला काही दिवसांपूर्वी नियुक्ती झाली होती. दरम्यान पंकज करडे यास पांढरी येथील वीजपुरवठा खंडित झाल्याचा फोन ऑपरेटर व तंत्रज्ञाने फोन केला होता. यावेळी पंकज करडे शिरसगाव सबस्टेशनला आला. वीजपुरवठा बंदची सूचना देऊन तो चुलतभावासह निघून गेला.
विद्युत बिघाड शोधत असताना अचानक वीजपुरवठा सुरू झाला. त्यामुळे खांबावरच जिवंत वीज तारेला चिपकून वायरमनचा मृत्यू झाला. घटनास्थळी पंकज करडेचा मृत्यू झाल्याची माहिती मृतकाच्या चुलतभावाने ऑपरेटरला भ्रमणध्वनीद्वारे देण्याचा प्रयत्न केला मात्र प्रतिसाद मिळाला नाही. यावेळी सदर घटनेची माहिती गावात होताच नागरिकांनी गर्दी केली. घटनास्थळावर लाडखेडचे ठाणेदार स्वप्निल निराळे, एपीआय बाळासाहेब नाईक कर्मचाऱ्यांसह दाखल झाले.
संतप्त नातेवाईकांसह ग्रामस्थांनी दोषींवर कारवाई होईपर्यंत मृतदेह खांबावरून खाली उतरविणार नाही, असा पवित्रा घेतला. मृतकाचा भाऊ दिगांबर राऊत यांच्या फिर्यादीवरून चौघांविरुद्ध गुन्हे नोंदविण्यात आले आहे. त्यानंतर मृतदेहासह ग्रामस्थांनी वीज वितरणवर धडक देत अचानक बंद असलेला वीजपुरवठा सुरू केल्याने कंत्राटी वायरमनचा मृत्यू झाल्याने दोषींवर कारवाई करून अटक करावी, अशी मागणी केली. अधिकाऱ्यांनी आश्वासन दिल्यानंतर मृतदेह शवविच्छेदनासाठी पाठविण्यात आला.
