नागपूर (वृत्तसंस्था) दि. १२ ऑक्टोबर गुरुवारपासून बेपत्ता असलेल्या वृद्ध व्यक्तीचा मृतदेह १३ ऑक्टोबर रोजी दुपारी भिवापूर येथून सात किमीवर गोडबोरी फाट्यापासून जवळच असलेल्या सावरगावनेरी पुनर्वसनातील मोकळ्या जागेत आढळून आला. शरीरावर असलेल्या जखमांवरून त्यांची हत्या करण्यात आल्याचा संशय व्यक्त केला जात आहे. सूर्यभान तानबा वानखेडे (७६) असे मृतकाचे नाव असून ते पुनर्वसित गाव सालेशहरी / सालेभट्टी येथे राहत होते.
भिवापूर येथे असलेल्या बँकेत जाण्यासाठी सूर्यभान गुरुवारी सकाळी ११ वाजता घराबाहेर पडले. येथील बँक ऑफ इंडियाच्या शाखेमधून त्यांनी २० हजार रुपये काढले. जवळ असलेल्या पिशवीत पैसे ठेवून ते बँकेमधून बाहेर पडले. नंतर धापर्ला येथील ठवकर नामक व्यक्तीच्या दुचाकीवर ते सायंकाळी चार वाजता गोंडबोरी फाट्यावर आले. रात्र होऊनही सूर्यभान घरी परत न आल्याने त्यांची पत्नी कांता व सून संध्या चिंताग्रस्त होते.
नातेवाइकांसह ओळखीच्या मंडळींकडे त्यांनी विचारपूस केली. रात्री नऊ वाजता पोलीस ठाणे गाठून पत्नी कांता यांनी हरविल्याची तक्रार नोंदविली. शुक्रवारी सकाळी १० वाजता परिसरातील गुराखी जनावरे चारण्यासाठी गोंडबोरी फाटा परिसरात गेले असता त्यांना सूर्यभान वानखेडे यांचा मृतदेह दिसला. त्यातील काही मृतकाला ओळखत होते. घटनेची सूचना मिळताच पोलिसांनी घटनास्थळी धाव घेतली.
सूर्यभान वानखेडे यांचा दोरीने गळा आवळल्यागत खुना, डोक्याला मार व शरीरावर किरकोळ जखमा असल्याचे आढळले. वानखेडे यांनी बँकेतून काढलेल्या २० हजारांच्या रकमेसह बोटात सात ग्रॅमची सोन्याची अंगठी होती. मात्र त्यांच्या मृतदेहाजवळ काहीही आढळून आले नाही. पैसे व अंगठीकरिता त्यांची हत्या करण्यात आली असावी, असा अंदाज व्यक्त करण्यात येत आहे.
