मुंबई (वृत्तसंस्था) राज्य सरकारने राज्यातील २५ जिल्ह्यांतील निर्बंधांमध्ये मोठ्या प्रमाणावर शिथिलता देण्यात आली आहे. मुंबई लोकल कधी सुरू होणार? हा प्रश्न सगळेच जण विचारत आहेत. या प्रश्नावर खुद्द मुख्यमंत्री उद्धव ठाकरे यांनीच मोठं विधान केलं आहे. लोकलबाबत जबाबदारीचं भान ठेवूनच हा निर्णय घेतला जाईल, असं उद्धव ठाकरे यांनी स्पष्ट केलं आहे. त्यामुळे लोकल सुरू होण्याच्या मुंबईकरांच्या आशा पल्लवीत झाल्या आहेत.
मुंबईत सर्वसामान्यांना लोकल प्रवासाची परवानगी कधी मिळणार, यावर मुख्यमंत्र्यांनी आपली भूमिका स्पष्ट केली आहे. मुंबईतील एच-पश्चिम वॉर्डमधील वॉर्ड ऑफिसच्या नव्या वास्तूच्या उद्घाटन प्रसंगी ते बोलत होते. लोकल कधी सुरु होणार? त्याच्यावर देखील विचार सुरू आहे. ज्या पद्धतीने आपण दुकानांना वगैरे शिथिलता दिल्या आहेत. त्याचप्रमाणे लोकलचा निर्णय देखील जबाबदारीचं भान ठेऊनच घेणार आहोत. त्यासंदर्भात मी लवकरच तुमच्याशी संवाद साधीनच”, असं मुख्यंमत्री उद्धव ठाकरे म्हणाले आहेत.
“मुंबई आणि इतर ठिकाणी पाहिलं तर महाराष्ट्रात कोरोनाची परिस्थिती संमिश्र स्वरूपाची आहे. अजूनही राज्यात कोरोनाची परिस्थिती संमिश्र आहे. काही ठिकाणी बऱ्यापैकी सुधारली आहे, पण काही ठिकाणी चिंताजनक नसली तरी चिंता करायला लागू नये याची काळजी घेण्यासारखी आहे. जिथे आपण शिथिलता देऊ शकलो, तिथे दिली आहे. जिथे देऊ शकलो नाही, तिथे नाईलाज आहे. पण याचा अर्थ असा नाही की हे बंद म्हणजे कायमचं बंदच राहील”, असं देखील मुख्यमंत्र्यांनी यावेळी नमूद केलं.
दरम्यान, यावेळी लॉकडाउनमध्ये शिथिलतेची मागणी करणाऱ्या व्यापाऱ्यांना देखील मुख्यमंत्र्यांनी आवाहन केलं. “आपण जिथे जिथे शिथिलता देऊ शकलेलो नाही, तिथल्या नागरिकांना आवाहन करतोय की कृपा करून संयम सोडू नका. असं काही नाही की कुणी आमचे शत्रू आहेत आणि कुणी आमचे लाडके आहेत. सगळ्या नागरिकांच्या जीवाची काळजी घेऊन निर्णय घ्यावे लागतात”, असं मुख्यमंत्री म्हणाले.
