नागपूर (वृत्तसंस्था) सुसाट वेगाने जात असलेल्या कारने मोटारसायकलला मागून जोरात धडक दिली. यात दुचाकीस्वार आईचा मृत्यू झाला तर मुलगा गंभीर जखमी झाला. हा अपघात नागपूर-अमरावती राष्ट्रीय महामार्गावरील कोंढाळी नजीकच्या चमेली शिवारात रविवारी (दि. २८) दुपारी झाला. सीताबाई शंकरराव वरडकर (६३) असे मृत आईचे तर प्रवीण शंकरराव वरडकर (३४) असे गंभीर जखमी मुलाचे नाव आहे.
सीताबाई ह्या आपला मुलगा प्रवीणसोबत मोटारसायकलने सोलू (घोराड) येथून कोंढाळी येथे त्यांच्या भावाकडे जात होत्या. चमेली (ता. काटोल शिवारात नागपूरहून कोंढाळी मार्गे अमरावतीच्या दिशेने वेगात येणाऱ्या (एम.एच-२७ / बीव्ही- ५२५५) क्रमांकाच्या कारने त्यांच्या मोटारसायकलला मागून जोरात धडक दिली. त्यामुळे दोघेही दुचाकीसह दूरवर फेकले गेले आणि रोडवर आदळले. यात गंभीर दुखापत झाल्याने सीताबाई यांचा घटनास्थळीच मृत्यू झाला तर प्रवीण गंभीर जखमी झाला. दुसरीकडे अपघात होताच चालकाने कार घटनास्थळाजवळ सोडून पळ काढला.
अपघाताची माहिती मिळताच पोलिसांनी घटनास्थळ गाठले. पोलिसांनी सीताबाई यांचा मृतदेह काटोल येथील ग्रामीण रुग्णालयात तर जखमी प्रवीणला उपचारासाठी कोंढाळी येथील प्राथमिक आरोग्य केंद्रात नेले. याप्रकरणी कोंढाळी पोलिसांनी कारचालकाविरुद्ध गुन्हा दाखल करण्यात आला आहे.
