जळगाव (प्रतिनिधी) पाळधी ते तरसोद बायपास या नवीन सुरु झालेल्या राष्ट्रीय महामार्गावर बुधवारी दुपारी साडे चार वाजेच्या सुमारास दोन मालवाहू ट्रक समोरासमोर एकमेकांवर धडकल्या. या अपघातात एका ट्रकचा चालक जागीच ठार झाला असून क्लिनरने बाहेर उडी मारल्यामुळे तो बालंबाल बजावला आहे तर, समोरील ट्रकचा चालक व क्लिनर गंभिर जखमी झाले आहेत.
गुजरातमधील मोरबी येथून खाकीनाडा (आंध्रप्रदेश) येथे टाईल्स घेऊन जाणारा ट्रक (क्रमांक ए.पी.३९, यु.एफ. ३५९९) व समोरुन भरधाव येणारा ट्रक क्रमांक (जी.जे. १६, ए.वाय ००७८) हा ओव्हरटेकच्या प्रयत्नात असताना दोघ ट्रकमध्ये पाळधी तरसोद बायपासवर जोरदार धडक झाली. ही धडक एवढी जोरात होती की, दोन्ही ट्रकच्या कॅबिनचा चुराडा झाला आहे. यात टाईल्स घेऊन जाणाऱ्या ट्रकचा चालक एस. के. मौलाली (४०, रा. एरुपालम, जि. खंमत, तेलंगणा) हा जागीच ठार झाला. तर, त्याच ट्रकचा क्लिनर एस. के. जानी याने बसंगावधान राखून कॅबिनमधून उडी घेतल्याने त्याला किरकोळ दुखापत झालेली असून तो बालंबाल बचावला आहे. तसेच समोरील दगडी कोळशाने भरलेल्या ट्रकचे चालक व क्लिनरहे दोन्ही कॅबिनमध्ये अडकल्याने दोघांना गंभीर दुखापत झाली आहे.
क्रेनच्या मदतीने काढला मृतदेह
मृत चालकाचा मृतदेह ट्रकच्या केबिनमध्ये अडकल्याने त्याला बाहेर काढणे अवघड झाले. जेसीबी आणि क्रेनच्या मदतीने ट्रकचा भाग बाजूला करून मृतदेह बाहेर काढण्यात आला. अपघाताच्या वेळी (जीजे १६ एवाय ००७८) क्रमांकाच्या ट्रकमध्ये दगडी कोळसा भरलेला होता, तर (एपी ३९ यूएफ ३५९९) क्रमांकाच्या दुसऱ्या ट्रकमध्ये बांधकामासाठी लागणाऱ्या टाइल्स होत्या. दोन्ही ट्रक कचरा फॅक्टरीजवळ एकमेकांवर आदळले. या जोरदार धडकेमुळे दगडी कोळशाने भरलेला ट्रक उलटला आणि दुसऱ्या ट्रकमधील टाइल्सचा ढिगही रस्त्यावर पसरला होता. अपघाताची माहिती मिळताच स्थानिकांनी आणि पोलिसांनी घटनास्थळी धाव घेतली. जखमींना तातडीने रुग्णालयात दाखल करण्यात आले आहे. या अपघातामुळे महामार्गावर काही काळ वाहतूक विस्कळीत झाली होती, मात्र पोलिसांच्या मदतीने वाहतूक पूर्ववत करण्यात आली. पोलिसांनी अपघाताची नोंद घेऊन पुढील तपास सुरू केला आहे.
