बुलढाणा (वृत्तसंस्था) कुटुंबातील एका मुलीचे लग्न संबंधाच्या निमित्ताने पुण्यावरून अकोल्याला जात असलेल्या कुटुंबाच्या कारला समृद्धी महामार्गावर मंगळवारी पहाटे भीषण अपघात झाला. या अपघातात एकाचा जागीच मृत्यू झाला तर कुटुंबातील चार जण जखमी झाले आहेत.
या अपघातामध्ये मिलिंद लक्ष्मण शिंदे (४५, रा. नेर, जि. यवतमाळ, ह. मु. पुणे) हे ठार झाले असून, त्यांची पत्नी माया मिलिंद शिंदे (४२) यांच्यासह मेघा मिलिंद शिंदे (२५), वैभव मिलिंद शिंदे आणि भारत लक्ष्मण शिंदे (३२) हे जखमी झाले आहेत. अपघातग्रस्त शिंदे कुटुंब हे यवतमाळ जिल्ह्यातील नेर येथील असल्याची माहिती समोर आली आहे. दरम्यान, शिंदे कुटुंब मुलीच्या लग्न संबंधासाठी अकोला येथे जात होते. जालना येथून ते समृद्धी महामार्गावरून प्रवास करीत होते. बिबी गावानजीक भरधाव वेगातील कार (एमएच १२ व्ही ०७६७) वरील चालकाचे नियंत्रण सुटले आणि कार समोरील ट्रकवर धडकली.
या अपघातात मिलिंद लक्ष्मण शिंदे, माया मिलिंद शिंदे हे दाम्पत्य गंभीर जखमी झाले. तर मेघा मिलिंद शिंदे, वैभव मिलिंद शिंदे व भारत लक्ष्मण शिंदे हे किरकोळ जखमी झालेत. सर्व जखमींना रुग्णवाहिकेद्वारे बिबी ग्रामीण रुग्णालयात उपचारार्थ दाखल केले. मात्र, तेथे मिलिंद शिंदे यांना डॉक्टरांनी मृत घोषित केले. अन्य जखमींवर बिबी ग्रामीण रुग्णालयात प्रथमोपचार करून जालना येथे हलविण्यात आला आले आहे.
