बीड (वृत्तसंस्था) महिलांना अर्धे तिकीट झाल्यापासून एसटी बसने प्रवास करण्यामध्ये प्रवाशांची संख्या वाढली आहे. त्यामुळे गर्दीचा फायदा घेत चोरटे सक्रीय झाले आहेत. रविवारी दि. ७ मे रोजी धारूर बस स्थानकात बसमधून एका प्रवासी महिलेचे ७५ हजार रूपये किमतीचे सोन्याचे दागिने चोराने लंपास केले.
असोला येथील महिला शालूबाई चोले या मुलासोबत बस स्थानकातून कळंबला जात असताना रविवारी दुपारी ३ च्या सुमारास बसस्थानकात एका अनोळखी महिलेने अंगावरील सोन्याचे दागिने काढून ठेवा गर्दी खूप आहे. चोरी होऊ शकते असे सांगितल्याने शालूबाई यांनी आपले १३ ग्राम वजनाचे जवळपास ७५ हजार किमतीचे सोन्याचे दागिने काढून पिशवीत ठेवले व कळंब गाडीत बसल्या.
बस तांबवापर्यंत गेली असता चोले यांनी पिशवीतील दागिने सुरक्षित आहेत की नाही याची खातरजमा केली असता दागिने गायब झाल्याचे लक्षात आले. यानंतर त्यांनी लगेच धारूर बस स्थानकात सबंधित महिलेचा शोध घेतला असता दागिने काढून ठेवा असे सांगणारी महिला सापडली नाही. यानंतर त्यांनी धारूर पोलिस ठाण्यात तक्रार दिली.
