नवी दिल्ली (वृत्तसंस्था) देशात मागील बऱ्याच काळापासून कोरोना रुग्णांमध्ये सुरु असणारी घट आजही पाहायला मिळत आहे. दुसऱ्या लाटेनं देशात हाहाकार माजवलेला असताना आता मात्र देशातील नव्यानं आढळणाऱ्या कोरोना रुग्णसंख्येचा आलेख उतरणीला लागला आहे. देशात गेल्या २४ तासांत १,२७,५१० नव्या कोरोना रुग्णांची नोंद करण्यात आली. तर २,७९५ जणांचा कोरोनामुळे मृत्यू झाला आहे. तर २,५५,२८७ जणांनी कोरोनावर मात केली आहे.
केंद्रीय आरोग्य मंत्रालयाकडून देशातील दररोजची आकडेवारी जाहीर करण्यात येते. गेल्या २४ तासांतील कोरोना परिस्थितीबद्दलचे आकडे मंत्रालयाने प्रसिद्ध केले असून, दिलासादायक चित्र दिसत आहे. आतापर्यंत देशात २,८१,७५,०४४ कोरोना रुग्ण आढळले. तर यापैकी २,५९,४७,६२९ रुग्णांनी कोरोनावर मात केली आहे. ३,३१,८९५ रुग्णांचा कोरोनामुळे मुत्यू झाला आहे. सध्या देशात १८,९५,५२० कोरोनाबाधित रुग्ण आहेत.
कोरोनाला रोखण्यासाठी देशात लसीकरण करण्यात येत आहे. मात्र लशींच्या तुटवड्यामुळे नागरीकांचे हाल होत आहेत. देशात अनेक राज्यात लसीकरण केंद्र बंद पडले आहे. देशात कासव गतीने लसीकरण होत आहे. आतापर्यंत २१,६०,४६,६३८ नागरिकांचे लसीकरण झाले आहे.
