मुंबई (वृत्तसंस्था) प्रसिद्ध गायक कृष्ण कुमार कुन्नथ (Krishnakumar Kunnath – KK) हे पंचतत्वात विलीन झाले आहेत. मुंबईत त्यांच्यावर अत्यसंस्कार करण्यात आले. अनेक वर्ष आपल्या आवाजाने चाहत्यांना मंत्रमुग्ध करणारा केके आज अखेर अनंतात विलीन झाला. केकेचा मुलगा नकुल यानं केकेवर अंतिमसंस्कार केले.
केकेचा मृत्यू अनैसर्गिक असल्याची नोंद करण्यात आली होती परंतू पोस्टमार्टम रिपोर्टमध्ये केकेचा मृत्यू हृदयविकाराच्या झटक्यानं झाल्याचं स्पष्ट झालं. केकेचं पार्थिव आज सकाळी एअर इंडियाच्या विमानाने कोलकत्त्याहून मुंबईत आणलं गेलं. सकाळी 10 ते 12:30 या वेळात केकेचं पार्थिव वर्सोव्याच्या प्लार्क प्लाझामध्ये अंत्यदर्शनासाठी ठेवण्यात आलं होतं. केकेचं अंतिम दर्शन घेण्यासाठी बॉलिवूडमधील अनेक गायक आणि कलाकार उपस्थित होते. केकेच्या चाहत्यांनी त्याचं अंत्यदर्शन घेण्यासाठी एकच गर्दी केली होती.
दुपारी 1 वाजता केकेच पार्थिव पार्क प्लाझायेथून वर्सोवा स्मशानभूमीच्या दिशेने रवाना झालं. फुलांनी सजवलेल्या गाडीतील केकेचं पार्थिव स्मशानभूमीच्या दिशेने नेण्यात आलं. वयाच्या 53 व्या वर्षीय केकेच्या जाण्यानं संपूर्ण बॉलिवूडवर शोककळा पसरली आहे. केकेच्या पश्चात त्याची पत्नी आणि दोन मुले असा परिवार आहे. केकेच्या निधनाची बातमी कळताच त्याची पत्नी ज्योती आणि मुलं तात्काळ कोलकत्ता येथे पोहोचले. रुग्णालयातून केकेचं पार्थिव कोलकत्ता येथील रवींद्र सदनमध्ये आणण्यात आलं.
90चा काळ गाजवणारा सर्वांचा लाडका गायकाचा अशाप्रकारे झालेला अंत सर्वांच्या जिव्हारी लागून गेलाय. त्यांच्या अंत्यदर्शनासाठी चाहत्यांचे अश्रू अनावर झाले होते. गायक अभिजीत भट्टाचार्य, गायिका श्रेया घोषाल, जावेद अली, अलका याज्ञी, जावेद अख्तर, शंकर महादेवन आदी कलाकार आणि गायकांनी लाडक्या केकेला शेवटचा निरोप देण्यासाठी उपस्थिती लावली होती.
‘खुदा जाने’, ‘तू ही मेरी शब है’, ‘तडप-तडप के’ आणि ‘यारों दोस्ती..’ ही गाणी आजही कायम लोकांच्या ओठावर असतात. केके यांनी हिंदीशिवाय इतर अनेक भाषांतील गाण्यांना आवाज दिला. त्यांनी तेलुगू, तमीळ, कन्नड, मराठी, मल्याळम, बंगाली आणि गुजराती भाषांमध्येही अनेक गाणी गायली आहेत. संपूर्ण कारकिर्दीमध्ये केके यांनी जवळपास 25 हजारपेक्षाही जास्त गाणी गायली.
