यवतमाळ (वृत्तसंस्था) मुलाचे वर्तन सुधारत नाही, त्याच्या पुढे हतबल झाली आहे, असे सांगत आईनेच मुलाच्या खुनाची सुपारी दिली. त्यासाठी मुलाचा मावसा, मावशी व मावस भाऊ यांची मदत घेतली. दोघांनी दोन हजार रुपये अॅडव्हान्स घेऊन मुलाला चौसाळा जंगलात नेले. तेथे गळा आवळला व दगडाने प्रहार करून त्याचा खून केला. २० एप्रिल रोजी घडलेली ही घटना रविवारी उघडकीस आली. लोहारा पोलिसांनी या गुन्ह्यात मृताच्या आईसह सहा जणांना अटक केली आहे. योगेश विजय देशमुख (२५, रा. नेरपिंगळी, ता. मोर्शी, जि. अमरावती) असे मृताचे नाव आहे.
आई, मावसा, मावशी व मावस भाऊला अटक !
या प्रकरणात पोलिसांनी त्याची आई वंदना विजय देशमुख, मावशी उषा मनोहर चौधरी, मावसा मनोहर चौधरी, मावसभाऊ लखन चौधरी (तिघे रा. देवीनगर, यवतमाळ) यांना अटक केली. तर सुपारी घेऊन योगेशची हत्या करणारे विक्की भगत व राहुल पठाडे (रा. देवीनगर, लोहारा) यांनाही ताब्यात घेतले आहे. मुलाचा प्रचंड त्रास आहे, त्याच्या जाचाला कंटाळून टोकाचे पाऊल उचलल्याचे आईने पोलिसांना सांगितले. मुलाला त्याच्या गावावरून यवतमाळात पाठविले. तो मामाकडे काही दिवस राहिला. या दरम्यान आई वंदना हिने बहीण उषा चौधरी हिच्या घरी जाऊन योगेशच्या खुनाचा कट रचला.
पाच लाखांत खुनाची सुपारी !
पाच लाख रुपयात खुनाची सुपारी देण्याचे ठरले. त्यापैकी दोन हजार रुपये अॅडव्हान्स देण्यात आला. विकी भगत व राहुल पठाडे या दोघांनी योगेशला २० एप्रिल रोजी चौसाळा जंगलात नेऊन त्याची हत्या केली. दोघांनी योगेशचा गळा आवळला. नंतर दगडाने त्याच्यावर प्रहार केले. पोलिस घटनास्थळी पोहोचले तेव्हा योगेशचा मृतदेह कुजलेल्या अवस्थेत त्याच्या खिशात डॉक्टरची चिठ्ठी सापडली. त्यावर योगेशच्या आईचे नाव व संपर्क क्रमांक नमूद होता. त्यावरून लोहारा पोलिसांनी मृतदेहाची ओळख पटविली आणि तपास सुरू केला होता. या प्रकरणी योगेशचे मामा प्रफुल्ल वानखेडे (रा. बांगरनगर) यांच्या तक्रारीवरून सहा जणांविरुद्ध कट रचून हत्या केल्याचा गुन्हा दाखल केला.
