जळगाव (प्रतिनिधी) पोत मंत्रवून देतो असे म्हणत दोघांनी मुलाकडे जात असलेल्या कस्तुरबाई लक्ष्मण पाटील (वय ६०, रा.जामनेगाव, ता. पाचोरा) या वृद्ध महिलेला रस्त्यात थांबवले. त्यानंतर दोघांनी वृद्धेला गळ्यातील पोत काढण्यास सांगत हातचालाखी करीत एक तोळे सोन्याचे पोत चोरुन नेली. ही घटना दि. १५ रोजी सकाळी साडेअकरा वाजेच्या सुमारास भजेगल्लीत घडली. याप्रकरणी जिल्हापेठ पोलीस ठाण्यात गुन्हा दाखल करण्यात आला आहे.
पाचोरा तालुक्यातील वरखेडीगावाजव असलेल्या जामनेगावात कस्तुरबाई लक्ष्मण पाटील या वृद्ध महिला वास्तव्यास आहे. दि. १५ रोजी सकाळी ८ वाजता बसने जळगावात राहणाऱ्या त्यांच्या मुलाकडे येण्यासाठी निघाल्या. नवीन बस स्थानकावर उतरल्यानंतर कस्तुरबाई या जूना खेडीरोडवरील दशरथ नगरात राहणारा त्यांचा मुलगा दशरथ पाटील याच्या भेटीकरीता जाण्यासाठी निघाल्या. भजेगल्लीतून मुलाकडे पायी जात असलेल्या वृद्ध महिलेला दोन अनोळखी इसमांनी थांबवले. यातील एक शरिराने जाड होता आणि त्याने डोक्यावर पांढरा रुमाल बांधलेला होता. तर दुसरा हा अंदाजे २० ते २५ वर्षाचा होता. त्यांनी वृद्ध महिलेच्या मागे जावून काही अंतरावर मावशी थांबा असे म्हणत थांबवले आणि त्यांनी एका मंदिराचा पत्ता विचारला. परंतू वृद्ध महिलेने त्यांना मला माहिती नाही असे सांगितले. महिलेने काढून दिली गळ्यातून पोत
पत्ता विचारणाऱ्यांनी कस्तुरबाई पाटील यांना म्हणाला की, तु आजारी होतीस तुझ्या कडून पैसे घेत नाही, तुला पोत मंत्रवून देतो, ती देवाऱ्यात ठेवायची असे म्हणत त्याने वृद्धेला गळ्यातील पोत काढायला लावली. वृद्धेने देखील गळ्यातील एक तोळ्याची पोत काढून त्या अनोळखी इसमाच्या हातात दिली.
मुलाच्या घरी न जाता गेल्या आईकडे
वृद्ध महिला ही मुलाच्या घरी न जाता भजेगल्लीतून थेट त्यांची राधाबाई बाजीराव पाटील रा. विठ्ठलपेठ, जनेगाव राजाराम मंगलकार्यालयाच्या समोर येथे गेल्या. त्यांनी कागदाची पुडी उघडून बघितली असता, त्यांना पोत दिसून आली नाही. त्यांनी घडलेला प्रकार त्यांच्या आईला सांगितला. त्यानंतर त्यांचा भाच्याला घरी बोलावून घेत संपुर्ण हकीकत सांगितली.
कुटुंबियांना माहिती दिल्यानंतर पोलिसात धाव
कुटुंबियांना हकीकत सांगितल्यानंतर कस्तुरबाई पाटील यांना अनोळखी इसमांनी बोलण्यात गुंतवणून हातचालाखी करीत त्यांची पोत लांबवल्याचे लक्षात आले. त्यांनी लागलीच जिल्हापेठ पोलीस ठाण्यात धाव घेत तक्रार दिली. त्यानुसार दोघ अनोळखींविरुद्ध गुन्हा दाखल करण्यात आला आहे.
हातातील पुडी देवघरात सांगितली ठेवण्यास
त्या इसमाने वृद्धेला बोलण्यात गुंतवणुक ठेवत ती पोत कागदात गुंडाळत असतांना, त्याने खाली पडलेला दगड आण असे वृद्धेला सांगितले. त्यानुसार वृद्धेने रस्त्यावर पडलेला दगड उचलून तो त्या इसमाच्या हातात दिला. त्याने कागदात गुंडाळलेली पोत मंत्रावून झाली आहे. घरी गेल्यावर ती देवाऱ्यात ठेवून पुजा करुन ती पुडी उघड असे सांगत ते दोघे तेथून निघून गेले.
