वुहान (वृत्तसंस्था) जागतिक आरोग्य संघटनेच्या तज्ज्ञांनी कोरोना व्हायरस महामारीच्या उत्पत्ती प्रकरणी आपला तपास सुरु केला आहे. आज डब्ल्यूएचओमधील काही विशेष अधिकारी वुहान शहराचा दौरा करणार आहेत. वुहान शहरात २०१९ मधील डिसेंबरमध्ये सर्वात आधी कोरोनाची लागण झालेला पहिला रुग्ण आढळून आला होता.
संपूर्ण जगामध्ये हाहाकार उडवून देणाऱ्या कोरोना व्हायरसची उत्पत्ती कशी झाली? हा व्हायरस कुठून आला? त्याचे मूळ काय? या प्रश्नांची उत्तरे शोधण्यासाठी जागतिक आरोग्य संघटनेचे तज्ज्ञांचे पथक अखेर वुहानमध्ये दाखल झाले आहे. जगामध्ये लाखो नागरिकांच्या मृत्यूला कारणीभूत ठरलेल्या, अनेक देशांचे अर्थचक्र ठप्प करणाऱ्या या व्हायरसने मानवी शरीरात कसा प्रवेश केला? ते शोधून काढण्यासाठी तज्ज्ञांची टीम वुहानमध्ये पोहोचली आहे. कामाला सुरुवात करण्याआधी दहा शास्त्रज्ञांच्या या टीमला दोन आठवडे क्वारंटाइनमध्ये रहावे लागणार आहे. कोरोना व्हायरसची उत्पत्ती कशा झाली? हे अद्याप न उलगडलेले कोडे आहे. काही तज्ज्ञांच्या मते प्राण्यांमधून या विषाणूने मानवी शरीरात प्रवेश केलाय, तर काहींच्या मते हे मानवनिर्मिती संकट आहे. त्यासाठी वुहानमधल्या प्रयोगशाळेकडे संशयाने पाहिले जाते. कोरोना व्हायरसचा पहिला रुग्ण चीनच्या वुहान शहरात आढळला होता. त्यानंतर हा संसर्गजन्य आजार जगभरात वेगाने फोफावला. आधीच या व्हायरसचे मूळ शोधण्याला बराच विलंब झाला आहे. WHO ची टीम चीनमध्ये दाखल झालेली असताना, तिथे पुन्हा एकदा कोरोना रुग्णांची संख्या वाढतेय. उत्तर चीनमध्ये पुन्हा एकदा कोरोना रुग्णांची संख्या वाढतेय. चीनने कोरोनावर बऱ्यापैकी नियंत्रण मिळवले होते. पण तिथे पुन्हा रुग्ण संख्या वाढतेय. एका प्रांतामध्ये आणीबाणी लागू करण्यात आली आहे.
डब्ल्यूएचओच्या पथकाच्या चीन दौऱ्याआधी देशात कोरोना बाधितांची संख्या वेगाने वाढली आहे. राष्ट्रीय आरोग्य मंत्रालयाने सांगितलं की, मंगळवारी देशात संसर्ग झालेल्यांमध्ये ११५ नवे कोरोना बाधित समोर आले. ज्यामध्ये १०७ रुग्णांना स्थानिक स्तरावर कोरोनाची बाधा झाली आहे. तर इतर रुग्ण देशाबाहेरुन आलेल्या लोकांशी संबंधित आहेत. राष्ट्रीय आरोग्य मंत्रालयाने सांगितलं की, राष्ट्रीय स्तरावर समोर आलेल्या प्रकरणांमध्ये ९० रुग्ण हेबेई प्रांतातील आणि १६ हेईलोंग जियांग प्रांतातील आहेत.
