नवी दिल्ली (वृत्तसंस्था) जगातल्या २१८ देशांतील कोरोना बाधितांची एकूण संख्या ६ कोटींवर पोहोचली आहे. गेल्या २४ तासात कोरोना बाधितांच्या संख्येत ६ लाखांची वाढ झाली आहे. वर्ल्डोमीटर वेबसाइटच्या माहितीनुसार, जगात आतापर्यंत ६.०७ कोटी कोरोनाची प्रकरणे समोर आली आहेत. तसेच कोरोनामुळे एकूण १४ लाख २५ हजार लोकांचा मृत्यू झाला आहे. त्याचसोबत एकूण ४ कोटी १९ लाख रुग्ण बरे झाले आहेत.
कोरोना उपचार सुरु असलेल्या रुग्णांची संख्या १ कोटी ७३ लाख इतकी आहे. तसेच १२ हजार कोरोना रुग्णांचा मृत्यू झाल्याचं समोर आलं आहे. त्या आधी एका दिवसात ११,७३३ रुग्णांचा मृत्यू झाला होता. आतापर्यंत जगात सर्वाधिक मृत्यू हे अमेरिकेत झाले आहेत. त्यानंतर मेक्सिको, इटली, पोलंड, ब्राझील, भारत, रशिया, इराण या देशांचा क्रमांक लागतो. कोरोना प्रभावाच्या यादीत सर्वात वरचा क्रमांक अमेरिकेचा लागतो. अमेरिकेत अजूनही मोठ्या प्रमाणात कोरोनाचे रुग्ण सापडत आहेत. गेल्या २४ तासात अमेरिकेत १ लाख ७८ हजार नव्या कोरोनाच्या रुग्णांची भर पडली आहे. त्यानंतर भारताचा क्रमांक लागतो. भारतात कोरोनाच्या रुग्णांची संख्या ९२ लाख इतकी झाली आहे. गेल्या २४ तासात भारतात ४४ हजार नव्या कोरोनाच्या रुग्णांची भर पडली आहे. तर कोरोनाच्या संख्येबाबत ब्राझीलचा जगात तिसरा क्रमांक लागतो. ब्राझीलमध्ये गेल्या २४ तासात ४५ हजार नव्या कोरोना रुग्णांची भर पडली आहे.
आतापर्यंत कोरोनाने मृत्यू झालेल्या संख्येपैकी ५६ टक्के लोक हे केवळ अमेरिका, ब्राझील, भारत, मेक्सिको, ब्रिटन आणि इटली या सहा देशांतील आहेत. तसेच जगातील २२ देशांतील कोरोनाची रुग्ण संख्या ही ५ लाखांवर गेली आहे. त्यात इटली, पेरू, दक्षिण आफ्रिका, इराण, जर्मनी, पोलंड आणि चिली या देशांचा समावेश आहे. भारत कोरोना रुग्णांच्या बाबतीत जगात दुसऱ्या क्रमांकावर आहे. तसेच अॅक्टिव्ह रुग्णांच्या बाबतीत भारताचा जगात सातवा क्रमांक लागतो. जगात सर्वात जास्त अॅक्टिव्ह रुग्णसंख्या अमेरिका, फ्रांस, इटली, बेल्जियम, ब्राझील आणि रशिया या देशांत आहे.
