छत्रपती संभाजीनगर (वृत्तसंस्था) वडिलांनी रात्री बाजीवर झोपलेल्या २५ वर्षीय मुलाला डोक्यात धारदार हत्याराने वार करून खून केल्याची धक्कादायक घटना नुकतीच उघडकीस आली होती. आकाश राजू उफाड असे मयताचे नाव आहे. दरम्यान, दररोज दारू पिऊन सतत शिवीगाळ करणे, मारहाण करणे अशा घटनांनी त्रस्त झाल्यामुळे बापाने मुलाचा खून केल्याची माहिती समोर आली आहे. छावणी पोलिसांनी तपास करून आरोपी वडील राजू शेणफड उफाड यास अटक केलीय.
पडेगाव परिसरात राजू उफाड हा आपल्या कुटुंबीयांसोबत राहत होता. राजूचा मोठा मुलगा मजुरी करतो, तर लहान मुलगा आकाश हा काहीच कामधंदा करत नसून, दारूच्या आहारी गेलेला होता. त्यामुळे आकाश घरी येताना दररोज दारू पिऊन वाद घालायचा. वडिलांना शिवीगाळ करणे आणि मारहाण देखील करायचा. गुरुवारी महालक्ष्मीनिमित्त राजू उफाड याची पत्नी मोठा मुलगा हे मुलीच्या घरी गेले होते. घरी राज आणि लहान मुलगा आकाश दोघेच होते.
गुरुवारी रात्री पुन्हा आकाश दारू पिऊन आला आणि त्याने वडिलांसोबत वाद घातला. दररोजचा त्रास राजूला असहा झाल्याने रात्री आकाश घरात समोरच्या रूममध्ये बाजीवर असताना धारदार शस्त्राने राजूने आकाशवर वार केले. यात रक्तबंबाळ झालेल्या आकाशचा मृत्यू झाला. या घटनेची माहिती सकाळी यांना राजूने पोलिसांना दिली. मात्र, त्याने हा खून कोणीतरी अज्ञात व्यक्तीने केल्याचे सांगितले. मात्र, घटनास्थळावरील बाहेरून कुणी येऊन केल्यासारखी नव्हती. यामुळे पोलिसांना राजूवर संशय आला. यानंतर राजूला विश्वासात घेतल्यानंतर त्याने आकाशच्या दररोजच्या त्रासाला कंटाळून त्याचा धारदार शस्त्राने वार करून खून केल्याची कबुली दिली.
