पुणे (वृत्तसंस्था) माजी गृहमंत्री अनिल देशमुख यांबाबत मोठा निर्णय कोर्टाने दिला आहे. त्यांची जप्त केलेली संपत्ती परत करा असे आदेश दिले आहेत. राष्ट्रवादीच्या पुण्यातील फायर ब्रँड नेत्या रुपाली पाटील (rupali patil) यांनीही फेसबुक पोस्ट करून याबाबतची माहिती दिली आहे. कोर्टाने आता महत्त्वाचे आदेश देतानाच ईडीला फटकारले असून त्यांच्या सर्व मालमत्ता परत करण्याचे आदेश दिले आहेत, अशी माहिती देशमुख यांचे वकील विपुल अग्रवाल यांनी दिले.
निलंबित पोलीस अधिकारी सचिन वाझेला 100 कोटी रुपये वसूल करण्याचं टार्गेट दिल्याप्रकरणी अनिल देशमुख यांना अटक करण्यात आली होती. त्यानंतर मुंबईचे माजी पोलीस आयुक्त परमबीर सिंग यांनीही देशमुखांवर गंभीर आरोप केले होते. या प्रकरणाची दखल घेत ईडीने देशमुख यांच्या घरावर छापेमारी केली होती. त्यानंतर देशमुख यांना अटक केली होती. या धाडी दरम्यान ईडीने देशमुखांच्या 11 मालमत्ता जप्त केल्या होत्या. 180 दिवसानंतर ईडीने ही कारवाई केली होती. कायद्यानुसार 180 दिवसानंतर मालमत्ता जप्त करता येत नाही. त्यामुळे सर्वोच्च न्यायालयाने 180 दिवसानंतर मालमत्ता जप्त केल्याप्रकरणी ईडीला फटकारलं असून अनिल देशमुख यांचे पुत्र आणि सूनेलाही मालमत्ता परत करण्याचे आदेश दिले आहेत.
रुपाली पाटलांची पोस्ट
दरम्यान, कोर्टाच्या या निर्णयानंतर राष्ट्रवादीच्या नेत्या रुपाली पाटील यांनी पोस्ट करून याबाबतची माहिती दिली आहे. सुप्रीम कोर्टाचा ईडीला दणका. माजी गृहमंत्री अनिल देशमुख यांची व कुटुंबाची ED ने जप्त केलेली सर्व संपत्ती अनिल देशमुख यांना परत करावी, सर्वोच्च न्यायालयाचा निर्णय. कायद्यापुढे कोणी मोठा नाही. जय संविधान भारतरत्न बाबासाहेब आंबेडकर यांचा विजय असो, अशी पोस्ट रुपाली पाटील यांनी केली आहे.
