नवी दिल्ली (वृत्तसंस्था) चीनमधील वुहान येथे कोरोना व्हायरसचा पहिला रुग्ण सापडला होता. चीनने अद्यापही कोरोना व्हायसरसाठी कारणीभूत ठरलेल्या कारणांचा शोध घेण्यासाठी आंतरराष्ट्रीय तज्ज्ञांच्या टीमला प्रवेश दिला नसल्याने जागतिक आरोग्य संघटनेने (WHO) नाराजी व्यक्त केली आहे.
जागतिक आरोग्य संघटनेचे प्रमुख ट्रेडोस अधनोम घेब्रेसस यांनी चीनवर जाहीर नाराजी व्यक्त केली आहे. यानंतर याची चाचपणी करण्यासाठी जागतिक आरोग्य संघटनेने जानेवारी महिन्यात १० सदस्यांची टीम चीनला पाठवण्याचा निर्णय घेतला होता. “चीनमधील अधिकाऱ्यांनी अद्यापही अधिकाऱ्यांना प्रवेश देण्यासाठी गरज असणाऱ्या सर्व परवानग्या घेतल्या नसल्याची माहिती आम्हाला मिळाली आहे,” असं टेड्रोस यांनी म्हटलं आहे. रॉयटर्सने यासंबंधी वृत्त दिलं आहे. पुढे बोलताना त्यांनी सांगितलं की, “मी चीनमधील वरिष्ठ अधिकाऱ्यांच्या संपर्कात असून हे मिशन जागतिक आरोग्य संघटनेची प्राथमिकता असल्याचं स्पष्ट केलं आहे”. प्राण्यांच्या आजारावरील तज्ज्ञ पीटर यांच्या नेतृत्वात ही टीम काम करणार आहे. जुलै महिन्यात पीटर चीनममध्ये प्राथमिक माहिती मिळवण्यासाठी गेले होते. दुसरीकडे चीन कोरोनाची नेमकी कुठून आणि कशी सुरुवात झाली याची माहिती गोळा करत आहे. वेगवेगळ्या अभ्यासातून कोरोनाचा प्रसार होणारी ठिकाणं वेगवेगळी असल्याचं समोर येत असल्याची माहिती एका अधिकाऱ्याने दिली आहे.
