चेन्नई (वृत्तसंस्था) परक्या महिलेसोबत बोलल्याच्या रागातून बायकोने नवऱ्याचा मोबाईल (Mobile) फोडला. त्यामुळे व्यथित झालेल्या नवऱ्याने आत्महत्या (Suicide) केल्याची धक्कादायक घटना तामिळनाडूतील चेन्नईमध्ये उघडकीस आली आहे. कृष्णा (वय २२ वर्ष) असं मयत तरुणाचं नाव आहे.
कृष्णा मूळचा उत्तर प्रदेशचा रहिवासी असून तामिळनाडूतील सुंगुवरछत्रम येथील एका खासगी कंपनीत नोकरी करत होता. एक वर्षापूर्वी कृष्णाचा विवाह त्याच्याच गावात राहणाऱ्या पूजा नावाच्या तरुणीशी झाला होता. सासरी परतल्यानंतरही नवरा नीट बोलत नसल्याने दोघांमध्ये भांडण झालं होतं. पूजा गावी गेली होती, मात्र जवळपास सहा महिन्यांच्या कालावधीनंतर सोमवारी ती सुंगुवरछत्रमला परतली. सहा महिन्यांनी दोघांची भेट झाली, मात्र बायकोशी गप्पा मारायचं सोडून कृष्णा आपल्या मोबाईलवर मेसेज करण्यात गुंग होता. पूजा रात्रीचे जेवण बनवायला गेली, तेव्हाही कृष्णा कोणाशी तरी फोनवर बोलत होता. काम आटोपल्यानंतर पूजा त्याच्याशी बोलायला आली, तरी तासभर तो एका महिलेशी फोनवर बोलत होता. पूजाने महिलेबद्दल विचारणा केली तेव्हा कृष्णाने ती आपली सहकारी असल्याचे तिला सांगितले.
परस्त्रीसोबत अफेअरचा आरोप
चिडलेल्या पूजाने तुझे त्या महिलेसोबत प्रेमसंबंध आहेत का, असा जाब विचारला. दोघांमध्ये यावरुन कडाक्याचे भांडण झाले. त्यानंतर तिने त्याचा फोन हिसकावला आणि फोडला. वादावादीनंतर पूजाने स्वत:ला एका खोलीत कोंडून घेतले, तर कृष्णाने व्हरांड्यात छताला गळफास लावून घेतला. अर्ध्या तासानंतर पूजाने दरवाजा उघडला तेव्हा तिला कृष्णा गळफास घेतलेल्या अवस्थेत दिसला. त्यानंतर शेजाऱ्यांनी पोलिसांना याविषयी माहिती दिली.
