जळगाव (प्रतिनिधी) : सुट्टी असल्यामुळे सोलापूर येथे गेलेल्या महापालिकेतील सेवानिवृत्त अधिकारी गोपालसिंग भिमसिंग राजपूत (वय ६८) यांच्या घरात चोरट्यांनी डल्ला मारला. येथून चोरट्यांनी रोख रकमेसह सोने चांदीचे दागिने असा एकूण ५३ हजार २०० रुपयांचा ऐवज चोरुन नेला. ही घटना दि. २६ रोजी सायंकाळच्या सुमारास यश लॉन परिसरात उघडकीस आली. याप्रकरणी शहर पोलीस ठाण्यात गुन्हा दाखल करण्यात आला आहे.
शहरातील यश लॉन परिसरात महापालिकेतून सेवानिवृत्त अधिकारी गोपालसिंग राजपूत हे वास्तव्यास आहे. दि. १० रोजी मुलांना सुट्टी असल्यामुळे ते मुलांना घेवून सोलापूर येथे राहत असलेल्या मुलीकडे गेले होते. दि. २५ रोजी रात्री ९ वाजेच्या सुमारास त्यांच्या शालकाचा मुलगा मयुर जाधव याने त्यांना फोन करुन तुमच्या घराच्या दरवाजाचे कुलूप तुटलेले असून चोरी झाल्याचे दिसत असल्याचे सांगितले. त्यावेळी राजपूत यांनी त्याला घरात जावून पाहणी करण्या सांगितले असता, त्यानुसार मयूर हा त्यांच्या घरात गेला असता, त्याला घरातील सामान अस्ताव्यस्त पडलेला दिसला त्याने याबाबतची माहिती राजपूत यांना दिली. त्यावेळी त्यांनी घराचा दरवाजा बंद करुन पोलिसांना माहिती देण्यास सांगितले.
घरी आल्यानंतर दिली पोलिसात तक्रार
मयूर जाधव याने पोलिसांना घटनेची माहिती दिल्यानंतर त्यांनी घटनास्थळी धाव घेत पाहणी केली. त्यानंतर दि. २६ रोजी सायंकाळी गोपालसिंग राजपूत हे घरी आल्यानंतर त्यांनी घरात पाहणी केली. यावेळी त्यांना घरातील बेडरुमध्ये असलेले लाकडी व लोखंडी कपाट उघडून त्यातील सामान अस्ताव्यस्त फेकलेला दिसून आला. तसेच सोने चांदीचा ऐवज देखील चोरट्यांनी चोरुन नेला. त्यानंतर राजपूत यांनी शहर पोलिसात तक्रार दिली असून त्यानुसार गुन्हा दाखल केला आहे.
