जळगाव (प्रतिनिधी) बंद असलेल्या दालमिलच्या कार्यालयातून रात्रीच्या वेळी चोरट्यांनी एक लाख १० हजार रुपयांचा मुद्देमाल चोरून नेल्याची घटना उघडकीस आली आहे. या प्रकरणी एमआयडीसी पोलिस ठाण्यात फिर्याद दिली. त्यावरून अज्ञात चोरट्याविरुद्ध गुन्हा दाखल करण्यात आला आहे.
यासंदर्भात अधिक माहिती अशी की, विद्यानगरातील रहिवासी गिरीराज ओमप्रकाश जाजू (५१) यांची औद्योगिक वसाहत परिसरातील एन ९८ सेक्टरमध्ये महालक्ष्मी युनी एक्झीम प्रा.लि. नावाची दालमिल आहे. ३१ जानेवारी रोजी रात्री जाजू हे दालमिल बंद करून घरी निघून गेले. १ फेब्रुवारी रोजी सकाळी ते दालमिलमध्ये परतले त्या वेळी त्यांच्या कार्यालयाच्या दरवाजासह कंपनीतील इतरही सर्व दरवाजे उघडे दिसले. त्यांनी परिसरात राहणाऱ्या कर्मचाऱ्यांना बोलवून त्यांना विचारणा केली असता त्यांना काहीही माहिती नसल्याचे सांगितले. त्यांनी कार्यालयातील टेबलच्या ड्रावरची पाहणी केली असता त्यातील रोख ६० हजार रुपये, चांदीचे एक किलो वजनाचे ३५ नाणे, चांदीचे पुजेचे साहित्य असा एकूण एक लाख १० हजार रुपयांचा ऐवज चोरील गेल्याचे समजले. या विषयी त्यांनी ३ फेब्रुवारी रोजी एमआयडीसी पोलिस ठाण्यात फिर्याद दिली. त्यावरून अज्ञात एमआयडीसी पोलिस ठाण्यात चोरट्याविरुद्ध गुन्हा दाखल करण्यात आला आहे.
