जळगाव (प्रतिनिधी) – शहरातील दाट वस्ती असलेल्या पिंप्राळा हुडको परिसरातील एका घरात सुरु असलेल्या कुंटणखान्यावर पोलिसांनी छापा टाकला. या कारवाईमध्ये चार पीडित महिलांची सुटका करण्यात आली. तर तीन ग्राहकांसह कुंटणखाना चालविणाऱ्या दोन पुरुष व एका महिलेला पोलिसांनी ताब्यात घेत त्यांच्याविरुद्ध गुन्हा दाखल केला. ही कारवाई मंगळवार दि. १ सप्टेंबर रोजी सायंकाळच्या सुमारास केली. गेल्या दीड वर्षात याच कुंटणखान्यावर तिसऱ्यांदा कारवाई करण्यात आली आहे.
शहरातील रामानंदनगर पोलिस ठाण्याच्या हद्दीतील पिंप्राळा हुडको परिसरातील एका अलिशान घरात कुंटणखाना सुरू असल्याची माहिती मिळाल्यावरून पोलिस अधीक्षक श्रीकांत धिवरे यांनी कारवाईच्या सूचना दिल्या. त्यानुसार प्रशिक्षणार्थी उपअधीक्षक सह्याद्री बिर्ले, रामानंदनगर पोलिस ठाण्याचे पोलिस निरीक्षक मधुकर साळवे, एएचटीयू विभागाच्या प्रभारी माधुरी बोरसे, उपनिरीक्षक दिनेश बडगुजर, सचिन रणशेवरे यांच्यासह त्यांच्या पथकाने सापळा रचला. त्यानुसार एका डमी ग्राहकाला कुंटणखाना सुरु असलेल्या घरात पाठविण्यात आले. घरात कुंटणखाना सुरु असल्याची खात्री होताच सापळा रचून बसलेल्या पथकाने छापा टाकला,
चार पीडित महिलांची सुटका गुन्हा दाखल पोलीसांनी छापा टाकल्यानंतर घरातीव वेगवेगळ्या खोल्यांमधून चार पीडित महिलांच सुटका करण्यात आली. तसेच ग्राहक म्हणू आलेल्या तिघांसह कुंटणखाना चालविणाऱ्या एका महिलेसह दोन पुरुषांना ताब्यात घेतल असून या प्रकरणी रामानंद पोलिस ठाण्या देण्यात आलेल्या फिर्यादीवरून ग्राहक कुंटणखाना चालविणाऱ्यांविरुद्ध गुन्हा दाखल करण्यात आला आहे.
बांग्लादेशी महिलेचा मोबाईल बदलविला
कुंटणखान्यातून चार पीडित महिलांमध्ये एक बांग्लादेशी महिला आहे. तसेच या ठिकाणाहून पाच मोबाईल पोलिसांनी ताब्यात घेतले. पीडितेंसह संशयितांना पोलीस ठाण्यात आणत असतांना जप्त केलेला मोबाईल बदलवून त्याठिकाणी दुसरा मोबाईल ठेवला. बदलवलेला मोबाईल पीडित बांग्लादेशी महिलेचा असून त्यामध्ये त्या महिलेची ओळख पटविसाठी असलेल्या कागदपत्रांसह अन्य डेटा होता. हा प्रकार वरिष्ठ अधिकाऱ्यांच्या लक्षात येताच त्यांनी कारवाईसाठी गेलेल्या अंमलदारांची चांगलीच खरडपट्टी काढून त्यांनी कठोर कारवाईचा इशारा दिला आहे.
कारवाईनंतर काही दिवसातच सुरु होतो पुन्हा कुंटणखाना पिंप्राळा हुडको परिसरात भर वस्तीमध्ये गेल्या अनेक वर्षापासून हा कुंटणाना सुरु आहे. याठिकाणी अनेकदा कारवाई करण्यात आली, मात्र कारवाईनंतर काही दिवसातच पुन्हा हा कुंटणखाना सुरु होत असल्याने आर्थीक हितसंबंध आहे का असा प्रश्न नागरिकांकडून उपस्थित केला जात आहे. तसेच गेल्या दीड वर्षात याच घरात सुरु असलेल्या कुंटणखान्यावर पोलिसांकडून तिसऱ्यांदा कारवाई करण्यात आली आहे.
