सिंधुदुर्ग (वृत्तसंस्था) माजी मुख्यमंत्री व भाजपचे राज्यसभा सदस्य नारायण राणे यांनी अनेक वर्षांपासून पाहिलेलं स्वप्न साकार होत आहे. नारायण राणे यांच्या मेडिकल कॉलेजच्या उद्घाटनाच्या निमित्ताने अमित शहा प्रथमच कोकणात येत आहेत. ‘हा माझ्या आयुष्यातील सर्वात आनंदाचा क्षण आहे’, अशा भावना नारायण राणेंनी व्यक्त केली आहे.
सिंधुदुर्ग जिल्ह्यात कुडाळ तालुक्यातील पडवे-कसाल येथे सर्व सुविधांनी सज्ज असं लाइफ टाइम मेडिकल कॉलेज उभारण्यात आलं असून या कॉलेजचं उद्घाटन रविवारी देशाचे गृहमंत्री अमित शहा यांच्या हस्ते होत आहे. ‘हा माझ्या आयुष्यातील सर्वात आनंदाचा क्षण आहे’, अशा भावना व्यक्त करतच राणे यांनी याबाबत माहिती दिली. सिंधुदुर्ग जिल्ह्यातील जनतेची भक्कम साथ मिळाल्याने मी मुख्यमंत्रिपदापर्यंत पोहचलो. येथील जनतेचा मी नेहमीच ऋणी राहणार आहे. आपल्या जिल्ह्यासाठी सतत काहीतरी करण्याचा प्रयत्न केला. जिल्ह्याचं आरोग्य ठणठणीत राहावं आणि जिल्ह्यात डॉक्टर घडावेत म्हणून मेडिकल कॉलेज आणि हॉस्पिटलचं स्वप्न मी पाहिलं होतं. हे स्वप्न पूर्णत्वास येत आहे, असे सांगतानाच यासाठी मुख्यमंत्री उद्धव ठाकरे यांचं सहकार्य कसं लाभलं याबाबत राणे यांनी प्रथमच भाष्य केलं.
मेडिकल कॉलेजसाठी राज्य सरकारच्याही काही परवानग्या आवश्यक असतात. हे करताना कोणत्या प्रकारची आडकाठी आली का?, असे विचारले असताना राणे यांनी अशी कोणतीही आडकाठी आली नसल्याचे सांगितले. केंद्र असेल वा राज्य सरकार असेल मेडिकल कॉलेजबाबत मला कुणीही आडकाठी केली नाही. उद्धव ठाकरे यांचं मला चांगलं सहकार्य मिळालं. मेडिकल कॉलेजची फाइल परवानगीसाठी राज्य सरकारकडे आली तेव्हा मी मुख्यमंत्री ठाकरे यांना फोन केला. तुमच्याकडे माझ्या कॉलेजची फाइल आली आहे. त्यावर सही करा, अशी विनंती मी त्यांना केली आणि त्यांनीही त्याला सकारात्मक प्रतिसाद दिला व फाइलवर सही केली. त्यासाठी मी त्यांचे आभारही मानले, असे राणे म्हणाले. मुख्यमंत्र्यांशी राजकीय वा कौटुंबिक चर्चा झाली का, असे विचारले असता सगळेच संवाद मीडियाला सांगायचे नसतात, असे सांगत राणे यांनी प्रश्नाचे उत्तर टाळले.
