जळगाव (प्रतिनिधी) गेल्या चार ते पाच दिवसापासून एका महाविद्यालयीन विद्यार्थिनीला काही फोटो व व्हिडिओ व्हायरल करण्याची धमकी देऊन ब्लॅकमेल करणाऱ्या विद्यार्थ्याला पिडीत विद्यार्थिनीच्या भाऊसह त्याच्या मित्रांनी चोप दिला. त्यानंतर त्याला रामानंदनगर पोलिसांच्या ताब्यात देण्यात आले. ही घटना रविवारी रात्री आदर्शनगरात घडली.
या संदर्भात अधिक असे की, बाहेर गावाहून जळगाव येथे शिक्षणासाठी आलेला एक विद्यार्थी हा आदर्श नगरमध्ये राहतो. तो ज्या महाविद्यालयात शिक्षण घेतो त्याच महाविद्यालयात शिक्षण घेणाऱ्या एका विद्यार्थिनीला गेल्या चार तो पाच दिवसापासून ब्लॅकमेल करीत होता. त्याच्याकडे असलेल्या मोबाईलमध्ये असलेले फोटो व व्हिडिओ व्हायरल करेल, अशी धमकी पिडीत विद्यार्थिनीला तो सातत्याने देत होता. हा प्रकार असह्य झाल्याने पिडीत विद्यार्थिनीने तिच्या मैत्रिणीला सांगितले. त्यानंतर या मैत्रिणीने पिडीत विद्यार्थिनीच्या भावाला हा प्रकार सांगितला. त्यावेळी विद्यार्थिनीच्या भावासह मित्रांनी ब्लॅकमेल करणाऱ्या विद्यार्थ्याला शोधून काढले व त्याला चांगलाच चोप देत पोलिसांच्या ताब्यात दिले.
याप्रकरणी पोलिसांकडून रात्री उशिरापर्यंत कारवाई सुरू होती. या विद्यार्थ्याकडे अनेक मोबाईल असून तो वेगवेगळ्या मुलींना हेरून त्यांना ब्लॅकमेल करीत होता, अशी चर्चा आहे. त्यामुळे पोलिस तपासात धक्कादायक माहिती समोर येण्याची शक्यता वर्तवली जात आहे. संबंधीत तरुणाने अजून किती मुलींची फसवणूक करुन ब्लॅकमेलिंग केले आहे ? यादृष्टीने पोलिसांनी तपास सुरु केला आहे.
