जळगाव (प्रतिनिधी) रशिया देशातील यारोस्लाव द वाईज नोव्हगोरोड स्टेट युनिव्हर्सिटीज मध्ये वैद्यकीयचे शिक्षण घेणाऱ्या जिल्ह्यातील तीन विद्यार्थी वोल्खोव्ह नदीच्या किनारी शहराच्या समुद्रकिनाऱ्याजवळ फेरफटका मारत होते. त्यावेळी लाट येऊन त्यांचा त्यात बुडून मृत्यू झाला. जिल्हाधिकारी आयुष प्रसाद यांनी रशिया येथील दुतावासातील कुमार गौरव (आय.एफ.एस) यांच्याशी संपर्क करून सर्व माहिती जाणून घेतली.
जळगाव जिल्ह्यातील भडगाव येथील हर्षल अनंतराव देसले तर अमळनेर येथील जिशान अश्पाक पिंजारी, जिया फिरोज पिंजारी हे विद्यार्थी रशियाच्या यारोस्लाव-द-वाईज नोव्हगोरोड स्टेट युनिव्हर्सिटीज मध्ये वैद्यकीय शिक्षण घेत होते. तिघे आणि त्यांचे सहअध्यायी विद्यार्थी त्यांच्या अभ्यासाच्या मोकळ्या वेळेत संध्याकाळी वोल्खोव्ह नदीच्या किनारी शहराच्या समुद्रकिनाऱ्याजवळ फेरफटका मारत होते. त्यावेळी त्या तिघांचा पाण्यात बुडून दुर्देवी मृत्यू झाल्याची घटना घडली. सध्या रशियन फेडरेशनमधील सर्व संबंधित एजन्सीं पढ़ील कार्यवाही करत आहे.
भारतीय दूतावासांनी घटनेची माहिती मिळताच जिल्हाधिकारी आयुष प्रसाद यांनी तातडीने विदेश मंत्रालयाशी संपर्क करून रशियातील भारतीय दुतावासातील अधिकाऱ्यांचे संपर्क क्रमांक मिळवून त्यांच्याशी संपर्क केला. भारतीय दुतावासाने संबंधित विद्यापीठाशी संपर्क करून माहिती जाणून घेतल्याचे सांगितले असून पुढील कार्यवाही सुरु आहे. पालकांना पूर्ण ते सहकार्य करण्याची विनंती जिल्हा प्रशासनाने भारतीय दुतावासच्या अधिकाऱ्यांना केली आहे.
