जळगाव (प्रतिनिधी) कंपनीत वेल्डींगचे काम करीत असतांना एका वृद्ध कामगाराचा शॉक लागून दुर्दैवी मृत्यू झाल्याची घटना बुधवारी दुपारी २ वाजेच्या सुमारास एमआयडीसी परिसरात घडली. भिमराव धोंडू पाटील ( वय ६०, रा. लमांजन, ता. जळगाव), असे मयताचे नाव आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
जळगाव तालुक्यातील लमांजन गावात भिमराव पाटील हे वृद्ध पत्नीसह वास्तव्यास होते. ते एमआयडीतील डी सेक्टरमधील पंचरत्न ट्रेलर या कंपनीत वेल्डर म्हणून नोकरी करीत होते. नेहमीप्रमाणे बुधवारी दुपारच्या सुमारास वेल्डींगचे काम करीत असतांना त्यांना विजेचा जोरदार धक्का बसला. यामध्ये ते जमिनिवर कोसळले ही घटना त्यांच्यसोबत काम करणाऱ्या कर्मचाऱ्यांच्या लक्षात येताच, त्यांनी भिमराव पाटील यांना लागलीच जिल्हा शासकीय वैद्यकीय रुग्णालयात दाखल केले. याठिकाणी वैद्यकीय अधिकारी डॉ. रेणुका भंगाळे यांनी त्यांची तपासणी करीत मयत घोषीत केले.
घटनेची माहिती मिळताच एमआयडीसी पोलीस ठाण्याचे पोलीस कर्मचारी रतिलाल पवार, शुद्धोधन ढवळे यांनी घटनास्थळी धाव घेत पंचनामा केला. त्यानंतर भिमराव पाटील यांच्या नातेवाईकांनी देखील जिल्हा रुग्णालयात मोठ्या प्रमाणात गर्दी केली होती. याप्रकरणी एमआयडीसी पोलिस ठाण्यात अकस्मात मृत्यूची नोंद करण्यात आली आहे.
