अमरावती (वृत्तसंस्था) शेतात काम करीत असलेल्या एका शेतकऱ्यावर वाघाने हल्ला चढविल्यामुळे शेतकरी गंभीर जखमी झाला आहे. ही घटना शुक्रवार, ८ सप्टेंबर रोजी सकाळी ८ वाजेच्या सुमारास धारणी तालुक्यातील शिवाझिरी शिवारात घडली. नारसिंह गटल्या चव्हाण (वय ६५ रा. शिवाझिरी), असे वाघाच्या हल्ल्यात जखमी झालेल्या शेतकऱ्याचे नाव आहे.
नारसिंह हे शुक्रवारी सकाळी आपल्या शेतात काम करीत होते. कामात मग्न असताना वाघाने अचानक त्यांच्यावर हल्ला केला. नारसिंह यांनी मदतीसाठी आरडाओरड केल्यावर वाघाने तेथून धूम ठोकली. आवाज ऐकून शिवारातील शेतकऱ्यांनी तेथे धाव घेतली. त्यांनी तातडीने घटनेची माहिती वन विभाग व पोलिसांना दिली. माहिती मिळताच वन विभागाचे अधिकारी, कर्मचारी आणि पोलिसांनी घटनास्थळ गाठले. जखमी नारसिंह यांना धारणी उपजिल्हा रुग्णालयात दाखल करून वाघाचा शोध सुरू करण्यात आला आहे.
वाघाच्या हल्ल्याची ही आठवडाभरातील दुसरी घटना आहे. ५ सप्टेंबर रोजी दुपारी दादरा शिवारात बकऱ्या चारायला गेलेल्या गीता शुकलाल धांडे (१७) हिच्यावरही वाघाने हल्ला चढविला होता. त्यावेळी वाघाने दोन बकऱ्यांचाही फडशा पाडला होता. त्यानंतर बुधवार, ६ सप्टेंबर रोजी हिराबंबई शिवारात वाघाने एका गाईचीसुद्धा शिकार केली होती. परंतु अद्यापही वाघाचा शोध लागलेला नाही. अशात वाघाने शुक्रवारी सकाळी शिवाझिरी शिवारात शेतकऱ्यावर हल्ला केला. त्यामुळे परिसरातील ग्रामस्थांमध्ये दहशतीचे वातावरण निर्माण झाले आहे.
