अमळनेर (प्रतिनिधी) तालुक्यातील बोदर्डे येथील ४७ वर्षीय इसमाने खाजगी सावकारांच्या जाचाला कंटाळून गळफास लावून जीवनयात्रा संपविल्याची घटना रविवारी २१ रोजी सकाळी ८ वाजता उघडकीस आली आहे. याप्रकरणी मारवड पोलीस स्टेशनला सोमवारी २२ जुलै रोजी सकाळी १० वाजता दोघेही सावकारांविरुद्ध गुन्हा दाखल करण्यात आला आहे. संतोष हिरामण मिस्तरी (वय ४५, रा.बोदर्डी ता. अमळनेर), असे मयत व्यक्तीचे नाव आहे.
संतोष मिस्तरी हे आपल्या पत्नी मंजुळबाई मिस्तरी यांच्यासह अमळनेर तालुक्यातील बोदर्डे गावात वास्तव्याला होतो. संतोष मिस्तरी यांनी अशोक दयाराम चौधरी यांच्याकडून २० हजार व मुडी येथील भालेराव गोविंदा महाजन यांच्याकडून १५ हजार रुपये व्याजाने घेतले होते. संपूर्ण कुटुंबीय मोलमजुरी करून २० हजाराचे आठवड्याला दोन हजार व १५ हजाराचे महिन्याला तीन हजार असे व्याज देत होते. मात्र, दोघेही घरी येवून व्याजाचे पैसे का देत नाही अस सांगत त्रास देत असत. तसेच त्या दोघांनी वेळोवेळी सुतारकाम करण्याचे साहित्य, दुचाकी, तसेच घरातील वस्तू उचलून नेल्या आहेत.
शनिवारी २० जुलै रोजी सायंकाळी अशोक चौधरी व भालेराव महाजन हे दोघे संतोष मिस्तरी यांच्या घरी आले. तू चालू हप्त्याचे व्याज दिले नाही असे म्हणू लागले. यावर संतोष मिस्तरी यांनी, व्याज देवूनही तुम्ही घरच्या वस्तू, दुचाकी, मिस्तरी कामाच्या वस्तू उचलून नेल्या आहेत असे सांगितले त्याचा त्यांना राग घेऊन त्यांनी शिवीगाळ केली व धमकी देवून गेले. त्यावेळी आजूबाजूचे सर्व लोक जमा झाले होते.
गावात बदनामी झाली या विवंचनेतून त्यांनी राहत्या घरातील मागच्या खोलीत जावून गळफास घेतला. हा प्रकार रविवारी २१ रोजी सकाळी ८ वाजता उघडकीला आला. पतीला पाहून पत्नी मंजूळाबाई यांनी एकच आक्रोश केला होता. शेजारी राहणाऱ्या ग्रामस्थांनी त्यांना खाली उतरवून अमळनेर ग्रामीण रुग्णालयात दाखल केले असता डॉक्टरांनी तपासून मृत घोषित केले. यावेळी कुटुंबीयांनी एकच आक्रोश केला. याबाबत मारवड पोलीस स्टेशनला अशोक चौधरी व भालेराव महाजन या खाजगी सावकारांच्या विरुद्ध गुन्ह्याची नोंद करण्यात आली आहे. पुढील तपास एपीआय शितलकुमार नाईक हे करीत आहेत.
