टोकयो (वृत्तसंस्था) हिंदुस्थानची महिला गोल्फर अदिती अशोक हिने टोकयो ऑलिम्पिकमध्ये पदकाच्या आशा पल्लवीत केल्या होत्या. मात्र, चौथ्या आणि अंतिम फेरीत तिला पदकाने हुलकावणी दिली आहे. अदितीचं पदक थोडक्यात हुकलं असून ती चौथ्या नंबरवर राहिली. अदिती अशोक ऑलिम्पिकमध्ये भारताकडून सर्वोत्तम खेळी करणारी गोल्फर झाली आहे. शेवटच्या शॉटपर्यंत अदिती पदकाच्या रेसमध्ये होती.
आज पहाटे ४ वाजेपासून आदिती अशोकनं गोल्फच्या मैदानावर आपली कमाल दाखवायला सुरुवात केली. वर्ल्ड रँकिंगमध्ये २०० व्या क्रमांकावर असणाऱ्या आदितीनं वर्ल्ड रँकिंगमध्ये अग्रस्थानावर असणाऱ्या नेल्ली कोरडा आणि मोने इनामी यांना कडवी टक्कर दिली. तिसऱ्या राऊंडपर्यंत आदिती अशोकनं आपलं दुसरं स्थान कायम राखलं होतं. चौथ्या राऊंडच्या १६ होल्सनंतर आदिती तिसऱ्या स्थानावर आली. याच वेळी खराब हवामानामुळे सामना थांबवण्यात आला. त्यावेळी आदितीला सिल्व्हर किंवा ब्राँझ मेडल जिंकण्याची पुरेपूर संधी होती.
खेळ थांबवला, तेव्हा ७० होल्सचा खेळ झाला होता. चौथा राऊंड संपत आला होता. या क्षणापर्यंत आदिती अशोकची तिसऱ्या स्थानासाठी लिडिओ को सोबत बरोबरी झाली होती. त्यामुळे पुढच्या दोन होल्सवर सर्वांचं लक्ष लागलं होतं. मात्र, यावेळी लिडिओ कोनं आघाडी घेतली आणि आदिती चौथ्या स्थानावर घसरली. ७२ होल्सचा खेळ संपल्यानंतर आदिती चौथ्या स्थानी राहिल्यामुळे तिचं पदकाचं स्वप्न भंगलं. मात्र, आजपर्यंत ऑलिम्पिक स्पर्धांमध्ये कोणत्याही भारतीय गोल्फपटूला करता न आलेली कामगिरी आदितीनं करून दाखवली आहे.
