बेळगाव (वृत्तसंस्था) हुबळीजवळील तारीहाळ बायपासवर भीषण अपघात (major accident) झाला आहे. ट्रक आणि खासगी बस यांच्यात जोरदार धडक झाली आहे. हा अपघात इतका भीषण होता की, आठ जणांचा मृत्यू झाला आहे तर २६ जण जखमी झाले आहेत. जखमींना उपचारासाठी तात्काळ रुग्णालयात दाखल करण्यात आले आहे.
नॅशनल ट्रॅव्हलची बस रात्री साडे बारा ते एकच दरम्यान कोल्हापूरहून बंगलोरला निघाली होती. तर तांदळाची वाहतूक करणारा ट्रक मुंबईकडे निघाला होता. बस चालकाने समोरील ट्रॅक्टरला ओव्हरटेक करताना समोरुन येणाऱ्या ट्रकला धडक दिली. यामध्ये ट्रक ड्रायव्हर, क्लिनर आणि बसमधून प्रवास करणाऱ्या सहा जणांचा मृत्यू झाला. अपघातात पाच जणांनी जागीच प्राण सोडले तर हॉस्पिटलमधे उपचार सुरु असताना बसमधील तीन प्रवाशांचा मृत्यू झाला. अपघातातील जखमींना हुबळी येथील केआयएमएस हॉस्पिटलमधे हलवण्यात आले असून तेथे त्यांच्यावर उपचार करण्यात येत आहेत.
अपघाताचे वृत्त कळताच हुबळी पोलीस आयुक्त लभुराम यांनी अपघात झालेल्या ठिकाणी भेट देऊन पाहणी केली. पोलिसांच्या माहितीनुसार बस कोल्हापूरहून बंगळुरुला जात होती. तेव्हा मध्यरात्री साडेबारा ते एकच्या दरम्यान धारवाडकडे जाताना बस एका ट्रॅक्टरला धडकली. बस चालत ट्रॅक्टरला ओव्हरटेक करण्याचा प्रयत्नात असताना हा अपघात झाला. या घटनेबाबत गुन्हा दाखल करण्यात आला आहे.
