मुंबई (वृत्तसंस्था) महाराष्ट्र राज्य माध्यमिक व उच्च माध्यमिक शिक्षण मंडळाकडून २०२१ आयोजित करण्यात आलेल्या उच्च माध्यमिक प्रमाणपत्र परीक्षेचे अर्ज भरण्यास १५ डिसेंबर पासून सुरुवात करण्यात येणार आहे.
कोरोनामुळे यंदा शाळा आणि महाविद्यालयांना सुट्टी असली तरी ऑनलाइन शाळा सुरू करण्यात आला आहेत. परीक्षा कधी आणि कशा घेणार याबाबत अद्याप माहिती देण्यात आली नाही. याशिवाय ऑनलाइन अभ्यासक्रम देखील पूर्ण करण्यावर भर दिला जात आहे. २०२१मध्ये होणाऱ्या बारावीच्या परीक्षेसाठी विद्यार्थ्यांना सोमवारी म्हणजेच १५ डिसेंबरपासून ऑनलाइन अर्ज करता येणार आहे. नियमित, पुनर्परीक्षार्थी, नाव नोंदणी प्रमाणपत्र प्राप्त झालेले विद्यार्थी सरल डेटा बेस वरून १५ डिसेंबर ते ४ जानेवारी दरम्यान अर्ज भरू शकणार आहेत. व्यवसाय अभ्यासक्रम घेतलेले विद्यार्थी ५ जानेवारी ते १८ जानेवारी दरम्यान अर्ज भरू शकणार आहेत. याबाबत महाराष्ट्र राज्य उच्च माध्यमिक शिक्षण मंडळ पुणे इथून ऑनलाइन पत्रक जारी करण्यात आलं आहे. www.mahahssc board.in या संकेतस्थळावर जाऊन तिथे आपण इयत्ता १२ वीच्या परीक्षेसाठी अर्ज भरू शकणार आहात. तिथे आपलं नाव, वैयक्तीक माहिती आणि विषय इत्यादी माहिती भरायची आहे. हा फॉर्म भरून झाल्यानंतर विद्यार्थ्यांना महाविद्यालयातून लॉगइनमधून प्री लिस्ट दिली जाणार आ़हे. या प्रीलिस्टची प्रिंट काढून त्यावर विद्यार्थ्यांनी स्वाक्षरी करावी आणि महाविद्यालयाकडे जमा करावी.
फॉर्म नंबर १७ द्वारे नोंदणी करणाऱ्या खाजगी विद्यार्थ्यांची २०२१ मधील परीक्षेची आवेदनपत्रे भरण्याचा कालावधी स्वतंत्रपणे निश्चित केला जाईल. त्यामुळे जाहीर केलेल्या कालावधीत या विद्यार्थ्यांची आवेदनपत्रे भरू नयेत, असेही मंडळाने स्पष्ट केले.
