जळगाव (प्रतिनिधी) येथील खोटे नगरात दोन पान टपरी फोडून ऐवज लांबविणाऱ्या दोघ चोरट्यांना राहत्या घरातून काल स्थानिक गुन्हे शाखेच्या पथकाने अटक केली आहे. त्यांच्या ताब्यातून चोरीचा मुद्देमाल हस्तगत करण्यात आला आहे.
पोलीस अधीक्षक डॉ. प्रविण मुंढे, अपर पोलीस अधीक्षक चंद्रकांत गवळी यांनी जळगाव शहरात घरफोडी चोरीचे गुन्हे उघडकिस आणणेकामी स्थानिक गुन्हे शाखेचे पोलीस निरीक्षक यांना सुचना केल्या होत्या. त्याअनुषंगाने पोलीस निरीक्षक किरणकुमार बकाले यांनी स्थानिक गुन्हे शाखेकडील सफो अशोक महाजन, पोहेका दादाभाऊ पाटील, पोहेका प्रदिप पाटील, पोहेकॉ जयंत चौधरी, पोना नंदलाल पाटील, पोना किरण धनगर, पोना प्रमोद लाडवंजारी, पोकॉ भगवान पाटील, पोका सचिन महाजन, चालक पोना अशोक पाटील यांचे पथक स्थापन केले होते.
याबाबत अधिक माहिती अशी की, पोलीस निरीक्षक किरणकुमार बकाले यांना गोपनीय माहीती मिळाली की, जळगाव शहरातील समतानगर भागात राहणारा इसम नामे भरत संजय सपकाळे हा घरफोडी चोरी सारखे गुन्हे करीत आहे. त्याअनुषंगाने वरील पथक हे समतानगर जळगाव येथे सापळा लावुन भरत संजय सपकाळे (वय २१ वर्षे, रा. समतानगर धामणगाव वाडा जळगाव) यास ताब्यात घेतले असता त्याने कबुली दिली की, सुमारे १० ते १२ दिवसापूर्वी मी व माझा साथीदार शाम सोपान कळस्कर (वय २१ वर्षे, रा. समतानगर धामणगाव वाडा, जळगाव) असे आम्ही दोघांनी खोटे नगर रिक्षा स्टॉप जवळ एक बंद पान टपरीचा टाळा तोडुन आत प्रवेश करून टपरीतील एक ओनीडा एलईडी २४ इंची टिव्ही व रोख रूपये चोरून नेले होते. तसेच त्या परिसरातील आणखीन दोन टपऱ्यांचे टाळे तोंडुन रोख रूपये चोरी केल्या बाबत सांगितले. अधिक चौकशीत सदर बाबत जळगाव तालुका पोलीस स्टेशनला गुन्हा दाखल आहे. सदर गुन्हयातील चोरीस गेलेली वर टिव्ही ही जप्त करण्यात आली आहे. याप्रकरणी पुढील कारवाईसाठी दोन्ही संशयितांना तालुका पोलीसांच्या ताब्यात देण्यात आले आहे.
