पाचोरा (प्रतिनिधी) तालुक्यातील आंबेवडगाव येथूनच जवळ असलेल्या कोकडी तांडा येथील गावातील शेतमजुरी करणाऱ्या दोघांवर गावाजवळीलच शिवारात बिबट्याने हल्ला चढवून त्यांना गंभीर जखमी केल्याची घटना २६ मार्च रोजी सायंकाळी ५.३० वाजेच्या सुमारास घडली.
पाचोरा तालुक्यातील आंबेवडगावपासून दोन किलोमीटर अंतरावर असलेल्या कोकडी तांडा येथील गावाजवळील शेत शिवारात मजुरीसाठी सरदार राजमल चव्हाण (वय ३४) व भिवसन मंगलू चव्हाण (वय ४०) हे दोघे गेले होते. या दोघांवर बिबट्याने अचानक हल्ला चढवून त्यांना गंभीर जखमी केल्याची घटना २६ रोजी सायंकाळी ५.३० वाजेच्या सुमारास घडली. यानंतर या दोघा जखमींना ग्रामस्थांच्या मदतीने तत्काळ पाचोरा येथील ग्रामीण रुग्णालयात उपचारासाठी दाखल करण्यात आले. त्यानंतर घटनेची माहिती वन विभागास देण्यात आली. वन विभागाचे अधिकारी व कर्मचाऱ्यांनी घटनास्थळाकडे धाव घेत माहिती जाणून घेतली. दरम्यान, जखमी सरदार चव्हाण व भिवसन चव्हाण यांच्यावर खासगी रुग्णालयात उपचार सुरू आहेत.
