जळगाव (प्रतिनिधी) आमच्या वाहनावर कारवाई होते, मग बांभोरीकडून येणाऱ्या वाहनांना अभय कसे? या रागातून मध्यरात्री अजिंठा चौक व गोविंदा रिक्षा थांबा येथे वाळू माफियांच्या दोन गटात गँगवार उफाळून आला. यावेळी गोविंदा रिक्षा थांब्यावर दुसऱ्या गटातील भुसावळ येथील गुन्हेगाराने गावठी पिस्तूलद्वारे गोळीबार केल्याचे कळते. यातून प्रचंड हाणामारी झाली असतांना पोलिसात तक्रार नोंदविण्यात आलेली नाही.
सूत्रांनी दिलेल्या माहितीनुसार, माहिती अधिकार कार्यकर्ता दीपक गुप्ता यांनी बुधवारी रात्री शिवाजी नगरात अवैध वाळू वाहतूक करणारे डंपर महसूल प्रशासनाला पकडून दिले. हे डंपर शहर पोलीस ठाण्याच्या आवारात लावण्यात आले. या कारवाईमुळे एक गटाने आपले टोळके घेऊन अजिंठा चौक गाठले. बांभोरीकडून वाळू घेऊन येणारे वाहने अडवायला सुरुवात करत काही चालकांना मारहाण झाली. त्यामुळे तेथे प्रचंड वाद झाला. आमच्या वाहनावर कारवाई होते मग बांभोरीकडून येणाऱ्या वाहनांना अभय कसे? असा मुद्दा यावेळी पुढे आला. मारहाणीत जखमी झालेल्या चालकांनी मालकांना या घटनेची माहिती दिली. हे टोळके तेथून गोविंदा रिक्षा थांब्याकडे आले. त्यांना शोधण्यासाठी दुसरा गट तेथे आला. दोन्ही गट एकमेकांमध्ये जोरदार भिडले. त्यातील एका गटाने कमरेतून गावठी पिस्तूल काढून हवेत गोळीबार केला तर एकाने वाहनातून तलवार काढल्याचे सांगितले जात आहे. वाळू माफियांमध्ये वाद झाल्याच्या वृत्तास पोलिसांनी दुजोरा दिला असला तरी गोळीबाराबाबत मात्र अधिकृत दुजोरा मिळू शकला नाही.
भुसावळच्या गुन्हेगाराकडून गोळीबार, पोलीस येताच पलायन
या वादाची माहिती मिळताच रात्रीच्या गस्तीवरील शहर पोलीस ठाण्याचे गजानन बडगुजर, करुणा सागर, बापू मोरे, भांडारकर व तेजस मराठे आदी जणांनी घटनास्थळी धाव घेतली. जिल्हा पेठ पोलीसही घटनास्थळी पोहचले होते. पोलिसांनी पाहून टोळके पसार झाले. घटनास्थळावर एम. एच. १५ बी. एस. ४१४१ या क्रमांकाची कार मिळून आली. डुप्लीकेट चावीने पोलिसांनीच ही कार पोलीस ठाण्यात आणली. त्यानंतर थोड्या वेळाने मिलिंद नावाचा कारचा चालक पोलीस ठाण्यात आला होता. त्याला मारहाण झाल्याचे सांगण्यात आले. बांभोरी व खेडी येथून वाळू उपसा करणाऱ्या माफियांमध्ये हा वाद झाल्याचे सांगण्यात आले. या वादाच्यावेळी एका वाळू माफियाने भुसावळ येथील गुन्हेगाराला जळगावात पाचारण केले. या गुन्हेगाराने गोळीबार करताच बाकीच्यांनी तेथून पळ काढला.
दोषींवर कारवाई केली जाईल – डॉ. प्रवीण मुंढे
रात्रीच्या वादाची माहिती मिळाली आहे. एक वाहन जमा करण्यात आले आहे. या प्रकरणाची चौकशी करुन दोषींवर कारवाई केली जाईल. यात कोणाचीही गय केली जाणार नाही, अशी माहिती पोलीस अधीक्षक डॉ. प्रवीण मुंढे यांनी दिली.
