पाचोरा (प्रतिनिधी) तालुक्यातील अंतुर्ली येथे आईला वाचवितांना मुलाचाही बुडून मृत्यू झाल्याची दुदैवी घटना आज सकाळी घडली. नितीन पंढरीनाथ पाटील आणि त्याची आई प्रतिभा पंढरीनाथ पाटील (वय-४५ रा. अंतुर्ली ता. पाचोरा) असे मयतांची नावे आहेत.
यासंदर्भात अधिक असे की, प्रतिभा पंढरीनाथ पाटील या आज त्यांचा मुलगा नितीन पंढरीनाथ पाटील याच्यासह शेतात फवारणी करण्यासाठी गेल्या होत्या. दरम्यान, फवारणीसाठी पंपासाठी लागणारे पाणी घेण्यासाठी प्रतिभा पाटील ह्या दुपारी २ वाजेच्या सुमारास शेतातील विहिरीजवळ गेल्या. विहिरीतून पाणी काढत असतांना त्यांचा तोल गेल्याने त्या विहिरीत पडल्या. आई विहिरीत पडल्याचे पाहून मुलगा नितीन पाटील याने देखील विहिरीत उडी मारली. दरम्यान विहिरीत गाळ असल्यामुळे आई व मुलगा यांचा बुडून मृत्यू झाला. या घटनेची माहिती मिळता परीसरातील शेतातील शेतकरी व नागरीकांनी धाव घेतली. विहीरीत पट्टीचे पोहणाऱ्यांनी तब्बल दोन तासानंतर आधी महिलेचे प्रेत काढले तर मुलाचा मृतदेह विहिरीतून काढला. पाचोरा ग्रामीण रूग्णालयात देाघांचे मृतदेह आणण्यात आले आहे.
