नवी दिल्ली (वृत्तसंस्था) कोरोनामुळे (Corona Virus) पुन्हा देशात भीतीचे वातावरण निर्माण झाले आहे. कोरोनाचा वाढता प्रादुर्भाव रोखण्यासाठी केंद्र सरकारकडून (Central Government) वेगवेगळी पाऊलं उचलली जात आहेत. आता केंद्र सरकारने कोरोना रुग्णांना हॉस्पिटलमधून डिस्चार्ज देण्याच्या पॉलिसीमध्ये (Corona Patient Discharge Policy) मोठा बदल केला आहे.
कोरोनाच्या हलक्या आणि मध्यम लक्षणं असलेल्या रुग्णांना पॉझिटीव्ह आल्यानंतर कमीत कमी सात दिवस आणि सलग तीन दिवस ताप न आल्यास सुट्टी दिली जाणार आहे. या रुग्णांना डिस्चार्ज आधी कुठलीही टेस्ट करण्याची गरज नाही. हा बदल पंतप्रधान नरेंद्र मोदी यांच्यासोबत कोरोना संदर्भात काल झालेल्या बैठकीनंतर करण्यात आला आहे.
केंद्रीय आरोग्य विभागाचे सचिव लव अग्रवाल यांनी म्हटलं की, मध्यम श्रेणीतील रुग्ण, विना ऑक्सिजन सपोर्ट आणि सतत तीन दिवस ९३ टक्क्यांहून अधिक सॅच्युरेशन असलेले रुग्ण कुठल्याही तपासणीशिवाय डॉक्टरांच्या सल्ल्यानं घरी जाऊ शकतात. जे रुग्ण सतत ऑक्सिजन थेरेपीवर आहेत त्यांनी लक्षणांबाबत समाधान झाल्यावर ऑक्सिजन सपोर्ट विना सलग तीन दिवस राहिल्यानंतर त्यांची क्षमता पाहून त्यांना डिस्चार्ज दिला जाऊ शकतो.
त्यांनी म्हटलं आहे की, इम्युनोकॉम्प्रोमाइज्डसह अन्य गंभीर प्रकरणातील रुग्णांचा डिस्चार्ज मात्र क्लिनिकल रिकव्हरीवर अवलंबून असेल. आरोग्य मंत्रालयाच्या माहितीनुसार महाराष्ट्र, पश्चिम बंगाल, दिल्ली, तामिळनाडु, कर्नाटक, उत्तर प्रदेश, केरळ आणि गुजरातमध्ये सर्वाधिक रुग्णवाढ होत आहे. यामुळं चिंता व्यक्त केली जात आहे. मात्र लव अग्रवाल यांनी सांगितलं आहे की, WHO च्या मते डेल्टावर ओमायक्रॉन हा चांगला उपाय म्हणून समोर येतोय. दक्षिण आफ्रिका, यूके, कॅनडा, डेन्मार्कच्या तुलनेत भारतात ओमायक्रॉन रुग्णांना दवाखान्यात भर्ती करण्याची जास्त गरज पडलेली नाही.
सर्व राज्यांच्या मुख्यमंत्र्यांसोबत आज पंतप्रधानांची बैठक
देशातील वाढत्या कोरोनाच्या स्थितीवर चर्चा करण्यासाठी पंतप्रधान नरेंद्र मोदी आज सर्व राज्यांच्या मुख्यमंत्र्यांसोबत चर्चा आज चर्चा करणार आहेत. सायंकाळी ४.३० वाजता पंतप्रधान व्हिडीओ कॉन्फरन्सिंगद्वारे ही चर्चा करणार आहेत. या चर्चेमध्ये महाराष्ट्राचे मुख्यमंत्री उद्धव ठाकरे हेदेखील सहभागी होणार आहेत. आजारपणानंतर पहिल्या मोठ्या बैठकीत मुख्यमंत्री उद्धव ठाकरे हे सहभागी होत असल्याने त्यांच्या सहभागाबद्दल उत्सुकता लागली आहे. सध्या देशामध्ये कोरोनाची रुग्णसंख्या झपाट्याने वाढत आहे. त्याचबरोबर ओमायक्रॉनच्या रुग्णसंख्येत देखील वाढ होत असल्याचे चित्र दिसत आहे.
