बीड (वृत्तसंस्था) शिरूर कासार तालुक्यातील हिंगेवाडी येथील एका महिलेचा विहिरीतील पाणी काढत असताना पायरीवरुन पाय घसरून पडल्याने मृत्यू झाल्याची घटना गुरुवारी सकाळी नऊ वाजण्याच्या सुमारास घडली. चंद्रकला दगडू फुलमाळी (वय ४० रा. हिंगेवाडी. ता. शिरूर कासार) असे या घटनेत मयत झालेल्या महिलेचे नाव आहे.
पाणी आणण्यासाठी विहिरीवर !
तालुक्यातील हिंगेवाडी येथील महिला चंद्रकला दगडू फुलमाळी (वय ४० रा. हिंगेवाडी. ता. शिरूर कासार जि. बीड) या आपल्या पुतण्यासोबत पाणी आणण्यासाठी विहिरीवर गेल्या होत्या. यावेळी विहिरीतील तुटलेल्या पायरीवरुन पाय निसटल्याने त्या खाली पडल्या. सदरील प्रकार त्यांचा पुतण्या भरत याने पाहिल्यानंतर तो घराकडे पळत गेला आणि घडलेला प्रकार सांगितला. यावेळी आजूबाजूचे लोक विहिरीकडे पळाले. परंतु तो पर्यंत मृतदेह विहिरीच्या तळाला गेला होता.
कुटुंबाचा आधारच गेला
मयत चंद्रकला दगडु फुलमाळी यांचे पती मानसिकदृष्ट्‌या आजारी असून संपूर्ण कुटुंबाचे पालनपोषण करण्याची जबाबदारी ही चंद्रकला यांच्यावरच होती. आपला पारंपारिक व्यवसाय सांभाळत त्या कुटुंबाची उपजीविका चालवत होत्या. परंतु या घटनेत त्यांचाच मृत्यू झाल्यामुळे संपूर्ण कुटुंब उघड्यावर आले असून कुटुंबाचा आधारच गेला आहे
पाणीटंचाईचा बळी
एप्रिल महिन्यातच तालुक्यातील नागरिकांना पाणी टंचाईच्या झळया जाणवू लागल्या असून पाणी टंचाईचा सामना करण्याची लढाई सुरू झाली आहे. पाणी टंचाईचा सामना करत असताना चालू वर्षात तालुक्यात पहिल्यादाच महिलेचा बळी गेला असून भविष्यात पाणीप्रश्न किती गंभीर असणार आहे याची जाणीव करून देणारा आहे.
