गोंदिया (वृत्तसंस्था) गणेशोत्सवात गणपतीच्या भोजनाच्या कार्यक्रमाहून घरी परत जात असलेल्या मोटारसायकलला भरधाव ट्रकने धडक दिल्याने एकाच कुटुंबातील तिघांचा मृत्यू झाला. ही घटना २८ सप्टेंबर रोजी दुपारी १ वाजता आमगाव-गोंदिया मार्गावरील गोरठाजवळ घडली. हृदयद्रावक म्हणजे मृतांमध्ये मोटारसायकल चालक तरुणासह त्याच्या आई आणि काकूचाही समावेश आहे.
भरधाव वेगाने जात असलेल्या टिप्परने मोटारसायकलला जोरदार धडक दिली. त्यात सुनीता सूरजलाल बिसेन (४५), व सत्यशीला ब्रिजलाल बिसेन (३५, दोन्ही रा. वॉर्ड क्रमांक ३, गिरोला) यांचा घटनास्थळीच मृत्यू झाला. दुचाकीचालक दीपक सूरजलाल बिसेन (२२) हा गंभीर जखमी झाल्याने त्याला उपचारासाठी गोंदियाच्या खासगी रुग्णालयात दाखल केले होते. उपचारादरम्यान २९ सप्टेंबरच्या पहाटे १ वाजता त्याचा मृत्यू झाला.
ठाणा येथील मुलीच्या घरून कार्यक्रम आटोपून आई आणि काकू दीपकसोबत मोटारसायकलने गावाकडे जात असताना ही घटना घडली. याप्रकरणी आमगाव पोलिसांनी गुन्हा नोंद केला आहे. एकाच कुटुंबातील तिघांच्याही अपघाती मृत्यूमुळे गावात शोककळा पसरली आहे. सौरभ शालिकराम मुंडे (२५, रा. बनगाव) यांच्या तक्रारीवरून आमगाव पोलिसांनी आरोपी ट्रकचालक मोरेश्वर सहसराम बोरसरे (४४, रा. कुंभार चौक घोटी, ता. गोरेगाव) याच्याविरुध्द भादंविच्या विविध कलमान्वये गुन्हा दाखल केला असून पुढील तपास पोलीस करत आहेत.
